اياگوزدە قازا تاپقان بالالار ۇيدە جالعىز قالعان - مينيستر
ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا اياگوزدەگى ءورت سالدارىنان 4 بالانىڭ قازا بولۋى جونىندە پىكىر ءبىلدىردى، دەپ حابارلايدى Kazinform اگەنتتىگى.
«قازىرگى ۋاقىتتا كوميسسيا جۇمىس جۇرگىزىپ جاتىر. بالالاردىڭ اكەسى جەدەل جاردەم قىزمەتىندە جۇمىس ىستەيدى، اناسى ازىق-تۇلىك الۋعا شىعىپ كەتكەن. بالالار ۇيدە جالعىز قالعان. نەگىزى بالالاردى جالعىز قالدىرۋعا بولمايدى. بۇعان دەيىن استانادا، جامبىلدا بولعان وقيعاعا ءبارىمىز كۋا بولدىق، قازىر اياگوزدە ورىن الدى. سوندىقتان قازىرگى ۋاقىتتا كوميسسيا ءوز شەشىمدەرىن شىعارادى. ءبىزدىڭ تاراپىمىزدان تەك قانا جاردەمدەسۋ - پسيحولوگيالىق قولداۋ كورسەتۋ»، - دەدى ەڭبەك ءمينسترى ەلوردادا «وزگەرىس داۋىرىندەگى ەڭبەك نارىعى» اتتى حالىقارالىق كونفەرەنسيا كۋلۋارىندا.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس وردابايەۆ وقيعانىڭ تەكسەرىلىپ جاتقانىن، مۇندا وقۋ-اعارتۋ مينيسترلىگى بالالاردىڭ قۇقىعىن قورعاۋ كوميتەتىنىڭ پىكىرى ماڭىزدى ەكەنىن ايتتى.
«مەملەكەت بەلگىلەگەن بارلىق قولداۋ شارالارى كورسەتىلەدى، دەگەنمەن مۇنداي جاعدايدا تەرگەۋ ناتيجەسىن كۇتۋ كەرەك»، - دەدى ۆيتسە-مينيستر.
ەسكە سالا كەتسەك، كەشە اياگوز قالاسىندا جەكە ۇيلەردىڭ بىرىندە ءورت شىعىپ، ءتورت بالانىڭ دەنەسى تابىلدى.
قازىر ءولىمنىڭ سەبەبى انىقتالۋدا. ءتيىستى ساراپتاما تاعايىندالىپ، پوليتسيا تەرگەۋ جۇرگىزۋدە.
