اياگوزدە ءتورت بالاسىنان ايىرىلعان وتباسىنا قانداي كومەك بەرىلدى - اكىم جاۋابى
اباي وبلىسىنىڭ اكىمى نۇرلان ۇرانحايەۆ ەلورداداعى ەسەپ بەرۋ بريفينگىندە اياگوزدە ءورت سالدارىنان ءتورت بالاسىنان ايىرىلعان وتباسىعا قانداي كومەك كورسەتىلگەنىن ايتتى، دەپ حابارلايدى Kazinform.
«وسى قايعىلى جاعداي بولعاندا ەڭ ءبىرىنشى اۋدان اكىمى، مەنىڭ ءبىرىنشى ورىنباسارىم سول وتباسىنىڭ قاسىندا بولدى. تولىعىمەن كومەك كورسەتتىك. قازىر ولارعا ۋاقىتشا ەكى بولمەلى پاتەر بەردىك. بۇل پاتەر تۇرمىستىق تەحنيكامەن، جيھازبەن تولىق جابدىقتالعان. جەلتوقسان ايىندا وزدەرىنىڭ قالاۋىمەن وسكەمەن قالاسىنان ەكى بولمەلى پاتەر بەرىلەدى. سەبەبى ولار وسكەمەن قالاسىندا تىركەۋدە تۇر. وسىنداي كومەك كورسەتىلدى، ءالى دە قاجەتتى كومەكتى كورسەتىپ جاتىرمىز»، - دەپ جاۋاپ بەردى ن. ۇرانحايەۆ ورتالىق كوممۋنيكاتسيالار قىزمەتىندە ءتىلشى ساۋالىنا.
بۇدان بۇرىن حابارلانعانداي، اياگوزدە ورتەنگەن ۇيدەن 4 بالانىڭ دەنەسى تابىلعان ەدى.
ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا بۇل بالالاردىڭ ۇيدە جالعىز قالعانىن ايتقان ەدى.
سونداي-اق، ق ر باس پروكۋراتۋراسى اياگوزدەگى 4 بالانىڭ ولىمىنە قاتىستى تەرگەۋ باستالعانىن حابارلادى.
