اياعىمەن سۋرەت سالاتىن قازاق سۋرەتشىسى تەھرانداعى حالىقارالىق فەستيۆالگە قاتىسۋدا - شەتەلدەگى قازاق باسپا ءسوزى

باركولدىك ىسمەر اپانىڭ جاساعان كەستەلى بۇيىمدارى جۇرتتى تاڭعالدىردى - Harajorga

29-قازان كۇنى شىڭجاڭنىڭ باركول قازاق اۆتونوميالى اۋدانىندا تۇراتىن ءبىر ىسمەر قازاق اپا بىزگە ءوزىنىڭ تىككەن ۇلتتىق ۇلگىدەگى بەل مەن تىزەنى سۋىقتان قورعايتىن كەستەلى كيىمدەرىن كورسەتتى، - دەپ جازادى قىتايدىڭ «Harajorga» اتتى ۆيچات پاراقشاسىندا.

باركولدىك ىسمەر اپا بەل جانە تىزەنى قورعايتىن اسەم كەستەلى بۇيىمدار تىگۋمەن اينالىسادى.

كەستەشى اپانىڭ ايتۋىنشا، بۇل تىزەقاپ جانە بەلدەمشە دەپ اتالاتىن قوسىمشا كيىمدەردىڭ تاريحى ۇزاق. وتكەن زامانداردا قازاق مالشىلارى قىستا نەمەسە كوكتەمدە كوشىپ- قونعان جولىندا دالاعا تۇنەپ قالاتىن جاعدايلار بولادى. سول كەزدەردە وسىنداي بەل مەن تىزەگە قوسىمشا كيىم كيىپ، سۋىقتان ساقتانادى ەكەن.

ايتا كەتەيىك، وسىنداي ادەمى كەستەلى بۇيىمداردى كورگەن الەۋمەتتىك جەلى قولدانۋشىلارى اپانىڭ شەبەرلىگىنە تاڭدانىپ، بۇنداي ونىمدەردى قايدان ساتىپ الۋعا بولاتىنىن سۇراستىرا باستاعان.

«قازاقي كەستەلەر - مەملەكەتتىك دەڭگەيدەگى ماتەريالدىق ەمەس مادەني مۇرا رەتىندە مادەني ءمانى تەرەڭ، كوركەمدىك قۇنى جوعارى، ۇلتتىق بوياۋى قانىق قولونەر بۇيىمى سانالادى. كەستە قازاق حالقىنىڭ تۇرمىس- تىرشىلىگىنە تىكەلەي قاتىسى بار. كەستەنىڭ ءتۇرى وتە كوپ، سان الۋان تۇردەن قۇرالادى. اتاپ ايتقاندا، قازاقتاردىڭ ۇيىندەگى سىرماق، تۇسكيىزدەن تارتىپ، كۇندەلىك ىستەتەتىن بۇيىمدار، كيىم، سومكەلەردىڭ بارىندە الۋان رەڭمەن بويالعان ويۋ- ورنەك سان ءتۇرلى كەستەلەر سالىنعان. ۇرپاقتان ۇرپاققا جالعاسقان وسى ماتەريالدىق ەمەس مادەني مۇرانى قولونەرشىلەر زامان كوشىنەن قالدىرماي جالعاستىرىپ كەلەدى. قولونەردىڭ وسى ءتۇرىن جالعاستىرىپ كەلە جاتقان، تاريحتىڭ بەتىنە اسەم كەستەمەن ورنەك سالىپ جۇرگەن ىسمەر اپاعا ۇلكەن قۇرمەت بىلدىرەمىز»، دەپ تۇيىندەيدى قىتايلىق باسىلىم.

مالايزياداعى قازاق ينجەنەرى قازىرگى قىزمەتى تۋرالى ايتىپ بەردى - Kaznews

ەرعۇلان وزات ۇلى مالايزياداعى قىزمەتى تۋرالى ايتىپ بەردى. بۇعان دەيىن برۋنەي دارۋسسالامدا كوپىر سالعان ەرعۇلان وزات ۇلى ەستەرىڭىزدە ما؟ ولاي بولسا جاس قازاق ينجەنەرى قازىرگى تاڭدا مالايزيادا قىزمەت اتقارىپ ءجۇر، دەپ جازادى موڭعوليالىق «Kaznews» اقپاراتتىق پورتالى.

اتالعان ب ا ق- تىڭ مالىمەتىنشە، ەرعۇلان وزات ۇلى 1993 -جىلى بايان- ولگييدە تۋعان. ول 2015 -جىلى ق ح ر- دىڭ شان دونگ ولكەسى، شينگ داو قالاسىنىڭ شان دونگ تەحنيكالىق ۋنيۆەرسيتەتىن گەودەزيالىق ينجەنەر ماماندىعىمەن بىتىرگەن.

ۇلانباتىر قالاسىندا حالىقارالىق اۋەجاي قۇرىلىسىنان ينجەنەرلىك جۇيە باعىتىندا گەودەزيالىق ينجەنەر بولىپ العاشقى جۇمىسىن باستاعان. كەيىن كورەيالىق ينجەنەرلەردىڭ ۇسىنىسى بويىنشا برۋنەي دارۋسسالام ەلىندەگى «Tambouring bridge» جوباسىندا، فيليپپيندە «Skyway» جوباسىندا جۇمىستار ىستەگەن. ول ءوزىنىڭ تاجىريبەسى مەن قىتاي ءتىلىن ءبىلۋىنىڭ ناتيجەسىندە قىتايلىق «China state construction» كومپانياسىنا دا جۇمىسقا تۇرعان.

ە. وزات ۇلى قازىرگى مالايزياداعى قىزمەتى تۋرالى ايتىپ بەرگەن.

ول مالايزيادا «east Cost Rail Link» دەپ اتالاتىن جوبادا جۇمىس ىستەيدى ەكەن. بۇل مالاككا بۇعازىنداعى پورت- كلانگ پەن مالايزيا تۇبەگىنىڭ سولتۇستىك- شىعىسىنداعى كوتا بحارۋ مەن شىعىس جاعالاۋداعى ەكونوميكالىق ايماق مەملەكەتتەرىن بايلانىستىراتىن ستاندارتتى ەكى جولدى تەمىرجول بايلانىسى ينفراقۇرىلىمىنىڭ جوباسى.

ناقتىراق ايتاتىن بولساق، تەمىرجول ينفراقۇرىلىمىنىڭ جوباسى جولاۋشىلاردى دا، جۇكتەردى دە مالايزيا تۇبەگىنىڭ باتىس جاعالاۋىنان شىعىس جاعالاۋىنا جانە كەرىسىنشە تاسىمالدايتىن بولادى. قۇرىلىس 2017 -جىلدىڭ تامىز ايىندا باستالعان كورىنەدى.

موڭعوليالىق قانداسىمىز بۇل جوبادا Site manager بولىپ قىزمەت اتقارادى ەكەن.

سونداي- اق، وسى اپتادا «Kaznews» - تە «حالال سەرتفاجەنسي - موڭعوليانىڭ حالال يندۋستريا سالاسىنىڭ دامۋىنا ۇلەس قوسپاق» دەگەن تاقىرىپتاعى اقپارات جاريالاندى.

دەمەك، حالال ونىمدەرى مەن قىزمەتتەرىن سەرتيفيكاتتاۋ جونىندەگى ورگان ەندى موڭعوليادا دا پايدا بولدى.

Kaznews- ءتىڭ دەرەگىنشە، پارسى شىعاناعى ەلدەرىنىڭ اككرەديتتەۋ ورتالىعىنىڭ Gulf Accreditation Center (GAC) باعالاۋ توبى حالال ونىمدەرى مەن قىزمەتتەرىن سەرتيفيكاتتاۋ جونىندەگى حالال سەرتف اجەنسي (Halal Certf Agency) كومپانياسىندا 2023 -جىلدىڭ 25، 26، 27-قازانىندا جۇمىس ىستەپ، GSO 2055- 2:2021 «سايكەستىكتى باعالاۋ – 2-ءبولىم: حالال سەرتيفيكاتتاۋ ورگاندارىنا قويىلاتىن تالاپتار» ستاندارتى بويىنشا باستاپقى اككرەديتتەۋ جۇمىسىن جاسادى.

ايتا كەتەيىك، بۇگىندە الەمدەگى 148 ەلدە حالال باعىتى جاقسى دامىعان. حالال برەندىن كىم كورىنگەن پايدالانىپ، كوپشىلىكتىڭ تۇسىنبەستىگىن تۋدىرماۋ ءۇشىن حالال ءوندىرىسى باقىلاۋعا الىنعان. وسى ورايدا ەت ەكسپورتىنا قىزىعۋشىلىق تانىتىپ وتىرعان موڭعوليادا حالال يندۋسترياسىن زەرتتەپ، حالال ونىمدەرىن قالىپتاستىرۋ ەندى جولعا قويىلىپ كەلەدى.

بۇل جۇيە UNIDO موڭعوليا - بىرىككەن ۇلتتار ۇيىمىنىڭ ونەركاسىپتىك دامۋ ۇيىمى جۇزەگە اسىراتىن سايكەستىكتى باعالاۋ ورگاندارىنىڭ الەۋەتىن ارتتىرۋ جوباسى اياسىندا جۇزەگە اسىرىلۋدا.

حالال بويىنشا اككرەديتتەۋ - موڭعولياداعى ساپانى باعالاۋ جۇيەسىندەگى جاڭا باعىتتارىنىڭ ءبىرى.

اياعىمەن سۋرەت سالاتىن قازاق سۋرەتشىسى تەھرانداعى حالىقارالىق فەستيۆالگە قاتىسۋدا - Parstoday

3-قاراشا تەھراندا مۇمكىندىگى شەكتەۋلى ونەرپازداردىڭ HOMAM اتتى 3- حالىقارالىق فەستيۆالى باستالدى.

قازاقستاننان كەلگەن مۇمكىندىگى شەكتەۋلى سۋرەتشى انار بەكسۇلتان «تالبەسىك»، «شىراقتار» جانە «كۇننىڭ باتىسى» اتتى تۋىندىلارىمەن اتالمىش فەستيۆالگە قاتىسىپ جاتىر.

بۇل تۋرالى وسى اپتادا يراننىڭ «Parstoday» اقپارات اگەنتتىگى حابارلادى.

اتالعان ب ا ق- تىڭ مالىمەتىنشە، اياعىمەن سۋرەت سالاتىن، تىگىن جانە كەستە تىگەتىن انار بەكسۇلتان - قازاقستاننىڭ تاراز قالاسىنىڭ تۇرعىنى. وسى قالانىڭ قۇرمەتتى ازاماتى، جامبىل وبلىسى ماسليحاتىنىڭ دەپۋتاتى، «شەبەر شاڭىراق» مۇگەدەكتەر قوعامدىق بىرلەستىگىنىڭ ديرەكتورى، «ادەمى قىز جاساۋى» اتتى شەبەرحاناسى بار كاسىپكەر.

وزبەكستاندا تۋريستىك پويىزدىڭ قاتىناۋى جولعا قويىلادى – ءو ز ا

Luxury Train Cruising پويىزى الەمدىك تۋريستەرگە سامارقاند، بۇحارا جانە حيۋا سياقتى تاريحي قالالارعا بارۋعا مۇمكىندىك بەرەدى، دەپ حابارلايدى «ءو ز ا» اقپاراتتىق اگەنتتىگى.

اتالعان باسىلىمنىڭ كەلتىرگەن مالىمەتىنە سۇيەنسەك، 2026 -جىلدان باستاپ وزبەكستاننىڭ تاريحي قالالارى ارقىلى وتەتىن Luxury Train Cruising پويىزىنىڭ قاتىناۋى جولعا قويىلادى.

كومپانيا مالىمەتىنە ساي، «وزبەكستان تەمىر جولدارى» ا ق مەن يتاليانىڭ «Arsenale Group S. P. A. كومپانيا اراسىندا وسى تۋرالى مەموراندۋمعا قول قويىلعان. ەكى تاراپ جوبانىڭ ءساتتى جۇزەگە اساتىنىنا جانە ونىڭ وزبەكستانداعى ءتۋريزمدى دامىتۋداعى ماڭىزدىلىعىنا سەنىم بىلدىرگەن.

الەمدىك تۋريستەردى سامارقاند، بۇحارا جانە حيۋا سياقتى تاريحي قالالارعا اپاراتىن Luxury Train Cruising پويىزى جولاۋشىلارعا ساپار كەزىندە بارىنشا جايلىلىقتى قامتاماسىز ەتۋ ءۇشىن زاماناۋي جابدىقتالماق.

ءۇرىمجى - الماتى اراسىنا قاتىنايتىن ۇشاق سانى كوبەيدى - «جەنمين جيباو»

30-قازان كۇنى تاڭەرتەڭ Air Astana ەنشىلەس كومپانياسى Flying Lion Air اۋەكومپانياسىنىڭ KC987 ۇشاعى ءۇرىمجى قالاسىنداعى حالىقارالىق اۋەجايعا كەلىپ قوندى. بۇل كومپانيانىڭ قىتايدىڭ شىڭجاڭ ءۇرىمجى قالاسىنان الماتىعا ۇشاتىن باعىتى قايتا قالپىنا كەلگەنىن كورسەتەدى. سودان باستاپ ۇرىمجىدەن الماتىعا ۇشۋ باعىتى اپتاسىنا 7 رەيستەن 9 رەيسكە دەيىن ۇلعايتىلدى، - دەپ حابارلايدى قىتايدىڭ «جەنمين جيباو» اقپاراتتىق پورتالى.

اتالعان ب ا ق- تىڭ كەلتىرگەن مالىمەتىنە سۇيەنسەك، قازاقستاندىق اۋەكومپانيانىڭ كەستەسىندە الماتى - ءۇرىمجى رەيسى تاڭعى جانە كەشكى دەپ ەكى كەزەككە بولىنەدى. تاڭەرتەڭگى كەزەك ءار اپتانىڭ سەنبى كۇنى ۇشادى، ال كەشكى كەزەكشى ۇشاق ءار اپتانىڭ جەكسەنبى كۇنى ۇشپاق.

«الماتى قازاقستاننىڭ شىعىس وڭتۇستىك شەكاراسىنا ورنالاسقان. قىتاي مەن قىرعىزستانعا جاقىن، قازاقستاننىڭ ەكونوميكالىق جانە وقۋ- اعارتۋ ورتالىعى. قازىر قىتاي وڭتۇستىك اۆياتسيا اۋەكومپانيالار توبى مەن قازاقستاندىق اۋەكومپانيا ۇرىمجىدەن الماتىعا بارىپ- كەلەتىن اۋە جەلىسىن بىرلەسىپ ىسكە قوسىپ وتىر»، دەپ جازادى People.cn.

قىتايلىق ب ا ق- تىڭ دەرەگىنشە، وسى جىلدىڭ العاشقى ءۇش توقسانىندا ءۇرىمجى اۋە پورتىنداعى حالىقارالىق جولاۋشىلار اعىنى تەز وسكەن. اتاپ ايتقاندا، 1868 حالىقارالىق جولاۋشىلار رەيسى ورىندالىپ، وتكەن جىلدىڭ سايكەس كەزەڭىمەن سالىستىرعاندا 2 ەسەگە كوبەيگەن. ەلگە 229460 ادام كىرىپ- شىعىپ، بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 19,3 ەسەگە ارتقان. «ءبىر بەلدەۋ، ءبىر جول» جوباسىنىڭ نەگىزگى ءوڭىرى رەتىندە ءۇرىمجى اۋە پورتى قازاقستان، وزبەكستان، قىرعىزستان، تۇرىكمەنستان جانە باسقا دا ەلدەر مەن وڭىرلەردى قامتيتىن جۇك مارشرۋتتارىن، بيزنەس- دجەت جانە جولاۋشىلار مارشرۋتتارىن دايەكتى تۇردە قالپىنا كەلتىردى. كەيىنگى ۇشۋ باعىتتارى ناقتى قاجەتتىلىكتەرگە سايكەس كەڭەيىپ، ودان ءارى جەدەلدەمەك.

ايەلدەر ءۇشىن ەڭ سەنىمدى ەل - تۇرىكمەنستان، ەكىنشىسى قازاقستان - TRT

تۇرىكمەنستان «2023 Women Peace and Security Index» - تە (ايەلدەردىڭ تىنىشتىعى مەن قاۋىپسىزدىگى يندەكسى WPS) 177 ەل اراسىندا 58- ورىندا.

بۇل كورسەتكىشپەن تۇركىمەنستان ەلى ورتالىق ازيا ەلدەرى اراسىندا ءبىرىنشى ورىندا.

اتالعان وڭىردەگى ەلدەر اراسىندا ايەلدەر تۇرعىسىنان ەڭ سەنىمدى ەكىنشى ەل - تىزىمدە 70- كەزەكتەگى قازاقستان. ارتىنان تاجىكستان، وزبەكستان جانە قىرعىزستان كەلەدى، دەپ جازادى تۇركيا راديو تەليەۆيزيا پورتالى.

تۇركيالىق ب ا ق- تىڭ مالىمەتىنشە، باسقا ايماق ەلدەرى اراسىندا ايەلدەردىڭ ەڭ سەنىمدى جەرلەرى - دانيا، شۆەيتساريا جانە شۆەتسيا. ەڭ سەنىمسىز ەلدەر بولسا - اۋعانستان، يەمەن، ورتالىق افريكا رەسپۋبليكاسى.

ايتا كەتەيىك، ايەلدەردىڭ تىنىشتىعى مەن قاۋىپسىزدىگى يندەكسى قالىپتاستىرىلعان كەزدە ەلدەردەگى جاعداي 13 كريتەرياعا قاراي قارالادى جانە وسى كريتەريالار ءۇش كاتەگورياعا بولىنەدى.

اتاپ ايتقاندا، ينكليۋزيۆتىلىك، ادىلەتتىلىك جانە قاۋىپسىزدىك.

اۆتور

بەيسەن سۇلتان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى