اتىراۋلىق وقۋشىلار وزەندى تازالايتىن قۇرىلعى ويلاپ تاپتى
استانا. قازاقپارات - اتىراۋلىق وقۋشىلار وزەن سۋىن لاستانۋدان قورعايتىن ءارى تازارتاتىن قۇرىلعى ويلاپ تاپتى، دەپ حابارلايدى 24KZ.
نازاربايەۆ زياتكەرلىك مەكتەبىنىڭ 4 وقۋشىسى جاڭا جوبانى 1 ايدا دايىنداپ شىعارعان. بۇگىندە ولار جوبانى ءالى دە جەتىلدىرىپ، سىناقتان وتكىزۋدى جوسپارلاپ وتىر.
«EcoWave»-تومەننەن جوعارىعا كومپرەسسور ارقىلى اۋا شىعاراتىن بىرنەشە تۇتىگى بار قۇبىر. قۇرىلعىنى وزەننىڭ تۇبىنە ورناتسا، سۋداعى قوقىس سۋ بەتىنە قالقىپ شىعادى. كەيىن ارنايى شىققان قوقىستى ارنايى قۇرالدارمەن جيناپ الىنادى. جايىق وزەنىنىڭ تاعدىرىنا الاڭداعان وقۋشىلار وسىلايشا ەرەكشە جوبانى ويلاپ تاپتى.
جانۇيا جاراس، وقۋشى:
- توپ مۇشەلەرى: احمەدي، ءالتايىر، سانجارمەن بىرگە بىرنەشە زەرتتەۋلەر جۇرگىزىپ، سول زەرتتەۋلەردىڭ ارقاسىندا جوبامىز سۋدى تازارتۋدىڭ ەڭ قاۋىپسىز ءادىسى ەكەنىن دالەلدەدىك. اۋا كوپىرشىكتەرى فلورا مەن فاۋناعا ەشقانداي زيان كەلتىرمەيدى. بالىقتاردىڭ قوزعالىسىنا كەدەرگى جاسامايدى.
بۇل جوبا، «EcoWave»-وزەندەردى پلاستيك پەن حيميالىق زاتتارمەن لاستانۋ ماسەلەسىنىڭ شەشىمى بولىپ تابىلادى. جوبانىڭ بالاماسى بۇعان دەيىن شەت ەلدەردە جۇزەگە اسقان. ءبىراق اتىراۋلىق وقۋشىلاردىڭ قۇرالى ولارمەن سالىستىرعاندا وزگەشە.
احمەدي زەينوللا، وقۋشى:
- امستەردامدا جۇزەگە اسقان جوبادان ءبىزدىڭ قۇرىلعى ەرەكشە. ويتكەنى ءبىز سۋ استىندا اۋا شىعاراتىن قۇبىردان بولەك، جانىنا تاعى ءبىر تۇتىك قويۋدى جوسپارلاپ وتىرمىز. سول ارقىلى حيميالىق ەرىتىندى سۋعا جىبەرىلەدى. ونىڭ سۋ ايدىنىنا ەشقانداي زيانى جوق. كەرىسىنشە قاۋىپتى حيميالىق زاتتاردان قورعايدى.
وقۋشىلار ەندى بۇل جوبامەن حالىقارالىق ءبىلىم بايگەسىنە قاتىسپاق. ۇستازدارى وقۋشىلاردىڭ ىزدەنىمپازدىعىن جوعارى باعالايدى.
اسقار ارىستانبايەۆ، زەرتحانا مەڭگەرۋشىسى:
- مەن وقۋشىلارعا روبوتاتەحنيكا، باعدارلامالاۋ باعىتى بويىنشا ۇيرەتتىم. سونداي-اق زەرتتەۋ جۇمىستارىن جۇرگىزۋگە جاردەمدەستىم. جوبانىڭ جۇزەگە اسۋى ءۇشىن ناقتى ءارى شىنايى اقپارات الۋ ماڭىزدى. قاجەتتى قۇرال-جابدىقتاردى تاۋىپ بەرۋگە تىرىستىم.
ەلەكتر ەنەرگياسىن ءتيىمدى پايدالانۋ ءۇشىن وقۋشىلار جەل مەن كۇننەن قۋات الاتىن قوندىرعى قولدانۋدى كوزدەيدى. ەندى وسى جوبانى جايىق وزەنىندە سىناپ كورۋدى جوسپارلاپ وتىر. ەگەر ەكولوگيا پروبلەماسىن شەشە السا، جوبانى كەڭىنەن ناسيحاتتاپ، جاپپاي قولدانۋعا ۇسىنباق.
