اتىراۋلىق وقۋشى 80 ەلدىڭ ۆاليۋتاسىن جيناعان
اتىراۋلىق وقۋشى ارتەم كەوركوۆ ءار ەلدىڭ اقشاسىن جيناپ ءجۇر. قازىر ونىڭ جەكە قورىندا قازاقستاننىڭ ۇلتتىق ۆاليۋتاسى سانالاتىن تەڭگەمەن بىرگە 80 مەملەكەتتىڭ اقشاسى بار، دەپ حابارلايدى Kazinform.
ونىڭ اكەسى سەرگەي دە ءار ەلدىڭ اقشاسىن جينايدى. ول بۇل ىسكە ۇلىنىڭ قىزىعۋشىلىعىن وياتقان. قازىر ارتەم كەوركوۆ اتىراۋ قالاسىنداعى 17№ مەكتەپ-ليتسەيىندە وقيدى.
وقۋشىنىڭ قورىندا 1993-جىلى قولدانىسقا ەنگىزىلگەن تەڭگەنىڭ العاشقى نۇسقالارى بار. مەرەيتويلىق داتالارعا بايلانىستى شىعارىلعان مونەتالار دا ساقتالعان.
«مەنىڭ قولىما تيگەن العاشقى بانكنوت - 30 جىل بۇرىن شىعارىلعان 100 تەڭگە. بۇل بانكنوتتا قازاق حانى - ابىلايدىڭ پورترەتى بەينەلەنگەن. ونى اكەم تۋعان كۇنىمە سىيلاعان ەدى. سول سەبەپتەن، ونى ەڭ قىمبات بانكنوت دەپ ەسەپتەيمىن. سودان بەرى ءار ەلدىڭ اقشاسىن جيناي باستادىم. قازاقتىڭ ۇلى تۇلعالالارى شوقان ءۋاليحانوۆ، اباي قۇنانباي ۇلى، قۇرمانعازى ساعىرباي ۇلى، ءسۇيىنباي ارون ۇلى، ءابىلقايىر حان بەينەلەنگەن تەڭگەلەر، ەۋروپا، افريكا، وڭتۇستىك افريكا، ونىڭ ىشىندە ترينيداد جانە توباگو، ەريتەريا، دجيبۋتي سەكىلدى 80 مەملەكەتتىڭ بانكنوتىن جينادىم»، - دەيدى ارتەم كەوركوۆ.
ارتەم بوس ۋاقىتىن تەككە وتكىزبەي، ءوزى جيناعان اقشالاردى زەرتتەۋگە ارنايدى. ءسويتىپ، ءار ەلدىڭ تاريحى مەن مادەنيەتى، ءتىپتى تابيعاتى تۋرالى اقپاراتتى ىزدەيدى.
«بارىنەن ەلىمىزدىڭ ۇلتتىق ۆاليۋتاسى - تەڭگەنىڭ ءجونى بولەك. تەڭگەنىڭ ديزاينىن ۇناتامىن. اكەم ەكەۋمىز شاعىن كورمە ۇيىمداستىرىپ، قاتىسۋشىلارعا تەڭگەنىڭ تاريحى، قۇندىلىعى تۋرالى اڭگىمەلەيمىز. ەلىمىزدىڭ ءار وڭىرىندە مونەتا الماساتىن دوستارىم بار»، - دەيدى كەوركوۆ.
