اتىراۋلىق قۇتقارۋشىلار شاتىرى ورتەنگەن ۇيدەن 82 جاستاعى اجەنى ارقالاپ شىعاردى
اتىراۋ. KAZINFORM - اتىراۋ قالاسىندا كوپقاباتتى تۇرعىن ءۇيىدىڭ شاتىرىندا كولىك شيناسى ورتەندى. جەرگىلىكتى قۇتقارۋشىلار ۇيدەن 45 تۇرعىندى ەكۆاكۋاتسيالادى.
اتىراۋ وبلىستىق توتەنشە جاعدايلار دەپارتامەنتىنىڭ قوعاممەن بايلانىس توبىنان ءمالىم ەتكەندەي، وقيعا بۇگىن، 21-قازاندا بولعان.
«بۇگىن تاڭەرتەڭ اتىراۋ قالاسىنداعى 9 قاباتتى تۇرعىن ءۇيدىڭ شاتىرىندا اۆتوكولىك شيناسى جانعانى تۋرالى حابار ءتۇستى. وقيعا ورنىنا جەدەل جەتكەن ءورت سوندىرۋشىلەر ءبىر-بىرىمەن ۇيلەسىمدى ارەكەت ەتتى. قۇتقارۋشىلار ءورتتىڭ تارالۋىنا جول بەرمەي، جەدەل ءسوندىردى. ءورت سوندىرۋشىلەر تۇرعىن ۇيدەن 45 ادامدى قاۋىپسىز جەرگە ەۆاكۋاتسيالادى. ونىڭ ىشىندە كامەلەتكە تولماعان 12 بالا بار. ال، 1942 -جىلى تۋعان اجەنى تازا اۋاعا ارقالاپ شىعاردى»، - دەپ حابارلادى دەپارتامەنتتىڭ قوعاممەن بايلانىس توبى.
ەسكە سالا كەتەلىك، بۇعان دەيىن 7-قازاندا كاسپي تەڭىزىنىڭ جاعالاۋىنداعى 5 گەكتار اۋماقتا قامىس ورتەنىپ جاتقانىن جازعان ەدىك.
كەيىن اتىراۋداعى قامىس ورتىنەن اۋادا لاستاۋشى زاتتار شەكتى مولشەردەن اسقانىن حابارلاعان بولاتىنبىز.
اۆتور
جولداسبەك شوپەعۇل
