اتىراۋداعى ءسىبىر جاراسىنان كەيىن بازارداعى ەت پاۆيلونى بىرنەشە كۇنگە جابىلدى

اتىراۋ وبلىستىق سانيتاريالىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى التىنگۇل ايمۇراتوۆانىڭ ايتۋىنشا، وسى كەزگە دەيىن 65 ساۋدا نۇكتەسى تەكسەرىلگەن. اتاپ ايتقاندا، ساۋدا ورىندارىنداعى پاۆيلوندار مەن ەت ساتاتىن دۇكەندەردەن 700 دەن استام سىناما الىنعان.

وبلىس اكىمىنىڭ باسپا ءسوز قىزمەتى ۇسىنعان اقپاراتقا قاراعاندا، اتىراۋ قالاسىنداعى ساۋدا ورىندارىن قايتالاپ تەكسەرۋ كەزىندە بازارلاردىڭ بىرىندە ءسىبىر جاراسى بەلگىلەرى انىقتالعان. ەكسپرەسس- تەستتەن اۋرۋ بەلگىلەرىنىڭ بار ەكەنى راستالعان.

وسىعان بايلانىستى اتىراۋ قالالىق باس سانيتار دارگەردىڭ قاۋلىسىنا سايكەس، بازاردىڭ ەت پاۆيلونى دەزينفەكتسيالىق شارالاردى جۇرگىزۋ ءۇشىن شۇعىل جابىلعان.

اتىراۋ وبلىستىق سانيتاريالىق- ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى التىنگۇل ايمۇراتوۆانىڭ مالىمەتىنشە، «دينا» بازارىنداعى ەت پاۆيلونىندا 54 ساۋدا نۇكتەسى بار. ال، 65 ادام دارىگەرلەردىڭ باقىلاۋىنا الىنعان.

قايتا تەكسەرۋ كەزىندە الىنعان سىنامالار رەسپۋبليكالىق سانيتارلىق-ەپيدەميولوگيالىق ساراپتاما ورتالىعىنا جىبەرىلدى. زەرتتەۋدىڭ سوڭعى ناتيجەلەرى بىرنەشە كۇننەن كەيىن بەلگىلى بولادى. ءقازىر اتالعان دەرەككە قاتىستى ەپيدەميولوگيالىق تەكسەرۋ ءجۇرىپ جاتىر.

ەسكە سالا كەتەلىك، بۇعان دەيىن اتىراۋداعى قاساپحانا جۇمىسشىسى ءسىبىر جاراسىنىڭ جەڭىل ءتۇرىن جۇقتىرعانىن حابارلاعان ەدىك. بىرنەشە كۇننەن كەيىن قاساپحانانىڭ تاعى ءبىر جۇمىسشىسىنان اۋرۋ بەلگىسى تابىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى