اتىراۋداعى اۋدان اكىمى ايەلىنىڭ ايىپتاۋىنا بايلانىستى پىكىر ءبىلدىردى
اتىراۋ. KAZINFORM - اتىراۋ وبلىسىنداعى ماقات اۋدانىنىڭ اكىمى رينات يبراگيموۆ بۇرىنعى ايەلىنىڭ ايىپتاۋىنا بايلانىستى پىكىر ءبىلدىردى.
اكىم جەكە ءومىرى تۋرالى پىكىر ايتۋدىڭ قاجەتى جوق دەپ سانايدى. ال، ورتاق بالالارى وزىمەن بىرگە تۇراتىنىن ايتتى.
«بۇرىنعى جۇبايىمنىڭ مەنىڭ اتىما تاققان نەگىزسىز ايىپتاۋلارى مەن جالعان اقپاراتى ب ا ق- تا كەڭىنەن تاراپ كەتتى. بۇرىنعى جۇبايىم ءارتۇرلى الەۋمەتتىك جەلىدە تاراعان سوڭعى وقيعالارعا بايلانىستى مەنىڭ لاۋازىمدى تۇلعا ەكەنىمدى بىلە تۇرا، وسىنداي مالىمدەمەلەر جاساپ جاتقان سياقتى. ءبىزدىڭ ورتاق بالالارىمىز - 2 قىزىم مەنىمەن بىرگە تۇرادى. ولار ماحاببات پەن سۇيىسپەنشىلىكتە ءومىر سۇرۋدە. مۇنداي شەشىم ەكى قىزىمنىڭ قالاۋى بويىنشا قابىلداندى. بۇدان باسقا بۇل تۋرالى سوتتىڭ زاڭدى شەشىمى دە شىقتى. شابۋىل جاسادى دەگەن ايىپتاۋلارعا كەلسەك، قازىر سوت پروتسەسى ءجۇرىپ جاتقاندىقتان، ب ا ق وكىلدەرىنەن اسىعىس قورىتىندى جاساماۋدى سۇرايمىن»، - دەدى رينات يبراگيموۆ.
ەسكە سالا كەتەلىك، بۇعان دەيىن اتىراۋدا اۋدان اكىمىنىڭ ايەلى كۇيەۋىنەن ءزابىر كورگەنى تۋرالى جازعان ەدىك.
كەيىن اۋدان اكىمىنىڭ ارەكەتىنە قاتىستى قىزمەتتىك تەكسەرۋ جۇرگىزىلەتىنىن حابارلاعان بولاتىنبىز.
اۆتور
جولداسبەك شوپەعۇل
