اتىراۋدا سۋ تاسقىنى كەزىندە قاپ تاسىعان پشون اتتى يتكە ەسكەرتكىش قويىلا ما
اتىراۋ. KAZINFORM - اتىراۋدا كوكتەمگى سۋ تاسقىنى كەزىندە جايىق وزەنىنىڭ جاعالاۋىندا پشون اتتى يت قاپ تاسىعان ەدى. الايدا قاراشانىڭ سوڭىندا بۇرالقى يتتەرمەن بىرگە جۇرگەن ونى اتىپ كەتتى.
پشون - اتىراۋ وبلىسىنىڭ ماحامبەت اۋدانىنداعى سارىتوعاي اۋىلىنىڭ تۇرعىنى زامزاگۇل جاڭابايەۆا اسىراعان يت. ونىڭ سۋ تاسقىنى كەزىندە قاپ تاسىعانى دا، كەيىن اتىلعانى دا ءتۇرلى قوعامدىق پىكىرگە ارقاۋ بولدى.
يەسىنە ادالدىعىن تانىتقان يتكە ەسكەرتكىش قويىلۋى مۇمكىن بە؟ ازىرگە مۇنداي ماسەلە قوزعالىپ وتىرعان جوق.
دەگەنمەن، قازاقستاندىق شەبەر ازامات كەنجەعاليەۆ پشوننىڭ سكۋلپتۋرالىق ءپىشىنىن جاساۋدى قولعا الدى. ول ءوزىنىڭ مەتالدان جاساپ جاتقان ەڭبەگىن الەۋمەتتىك جەلىدەگى پاراقشاسىنا جۇكتەدى.
ءبىر ەرەكشەلىگى، ءيتتىڭ ءپىشىنى جۇرەك تۇرىندەگى تەمىر بولشەكتەرىنەن قۇراستىرىلعان. شەبەر بۇل جۇمىسىن پشوننىڭ اتىلعاننان بىرنەشە كۇن وتكەن سوڭ باستاعان.
ەسكە سالا كەتەلىك، بۇعان دەيىن پشوننىڭ يەسى زامزاگۇل جاڭابايەۆا كۇشىك كەزىنەن اسىراعان ءيتى قاباعان ەمەسىن ايتقانىن حابارلاعان ەدىك.
كەيىن ءيتتىڭ ولىمىنە بايلانىستى جەرگىلىكتى پوليتسيا قىلمىستىق ءىس قوزعاعانىن جازعان بولاتىنبىز.
