اتىراۋدا كيىك اۋلاعانداردان 335 ءمۇيىز تاركىلەنىپ، 283 ميلليون تەڭگە ايىپپۇل ءوندىرىلدى

اتىراۋ وبلىستىق پوليتسيا دەپارتامەنتى تابيعات قورعاۋ پوليتسيا توبىنىڭ اعا ينسپەكتورى نۇرلىبەك قاناتوۆتىڭ مالىمەتىنشە، كەشەدەن بەرى «كيىك-2024» تابيعاتتى قورعاۋ اكسياسى ءوتىپ جاتىر.

«بۇل اكسيانى وتكىزۋدىڭ بىرنەشە ماقساتى بار. بىرىنشىدەن، كيىك پوپۋلياتسياسىن قورعاپ، سانىن كوبەيتۋگە ىقپال ەتۋ. ەكىنشىدەن، براكونەرلەرگە قارسى كۇرەس كۇشەيتىلىپ، قۇقىق بۇزۋشىلارعا قاتاڭ جازا قولدانىلادى. ماسەلەن، بيىل جىل باسىنان بەرى وبلىستا جانۋارلار دۇنيەسىن قورعاۋعا قاتىستى 83 قۇقىق بۇزۋشىلىق انىقتالدى. قۇقىق بۇزۋشىلاردان 335 دانا كيىك ءمۇيىزى، 7 تىركەلمەگەن تەگىس ۇڭعىلى اڭشى قارۋى تاركىلەندى»، - دەيدى نۇرلىبەك قاناتوۆ.

ال، وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باس مامانى مەرەكە شالحاروۆتىڭ پىكىرىنشە، كيىكتىڭ كوبەيۋىنە كەرى اسەر ەتەتىن قاۋىپتى سەبەپتەر بار.

«الدىمەن بۇل جايت براكونەرلىككە قاتىستى بولىپ وتىر. ەكىنشىدەن، تابيعي سيپاتتاعى اپاتتاردىڭ ىقپالى بار. ۇشىنشىدەن، كيىك مەكەندەيتىن جەر ازايدى. بىلتىر 7 قىلمىستىق ءىس تىركەلىپ، سوتقا جولدانعان ەدى. سونىڭ ناتيجەسىندە وندىرىلگەن قارجى 6,5 ميلليارد تەڭگەنى قۇرادى. ال، بيىل تىركەلگەن قىلمىستىڭ 4 ەۋى سوتقا جولداندى. كيىكتى زاڭسىز اۋلاۋشىلاردان 283 ميلليون تەڭگەگە جۋىق قارجى مەملەكەت پايداسىنا ءوندىرىلدى. وزگە قىلمىستىق ىستەر ەكەۋى تەرگەلىپ جاتىر»، - دەپ حابارلادى مەرەكە شالحاروۆ.

«وحوتزووپروم «ءو ب» ر م ق ك باس ديرەكتوردىڭ ورىنباسارى باقتيار رامازانوۆتىڭ ايتۋىنا قاراعاندا، قازىر اۋا رايىنىڭ سالقىنداۋىنا بايلانىستى كيىكتىڭ كوشى-قونى اۋىستىرادى.

«قازىر كيىكتەر اتىراۋ وبلىسىنا قاراي باعىت الدى. سول سەبەپتەن، بىزدەگى ارنايى جاساق توپتارى كۇشەيتىلدى. كيىكتىڭ قوزعالىسىن باقىلاۋعا 225 ينسپەكتور تارتىلىپ وتىر. ولارعا 150 گە جۋىق كولىك ءبولىندى»، - دەپ ءمالىم ەتتى باقتيار رامازانوۆ.

ەسكە سالا كەتەلىك، بۇعان دەيىن اتىراۋدا براكونەرلەردەن ءبىر ايدا 300 دەن اسا كەلى بەكىرە تاركىلەنگەنىن جازعان ەدىك.

اۆتور
جولداسبەك شوپەعۇل

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى