اتىراۋدا كوبىندە اۋقاتتى، تولىق وتباسىنان شىققان بالالار وزىنە قول جۇمساۋعا بەيىم - اكىم ورىنباسارى

اتىراۋ وبلىسى اكىمىنىڭ ورىنباسارى جاسۇلان بيسەمبييەۆتىڭ ايتۋىنشا، وزىنە قول جۇمساۋعا بەيىم جاسوسپىرىمدەر سانى ارتقان.

— سوڭعى كەزدەرى جاسوسپىرىمدەردىڭ پسيحولوگيالىق- ەموتسيونالدىق جاي- كۇيى الاڭداتا باستادى. ولاي دەيتىنىم، اتىراۋ وبلىسىندا وزىنە قول جۇمساۋعا ۇمتىلعان بالالاردىڭ سانى ارتىپ وتىر. كورسەتكىش بىلتىرعى جىلمەن سالىستىرعاندا ەكى ەسە وسكەن. بيىل 38 بالا وزىنە قول جۇمساماق بولعان. وكىنىشكە قاراي، 9 جاسوسپىرىمگە جاقىندارى تاراپىنان دەر كەزىندە كومەك بەرىلمەگەن. قايعىمەن اياقتالعان سوڭعى ەكى وقيعانى ايتايىن. جاقىندا اتا- اناسىنا رەنجىگەن 14 جاسار قىز بەن 15 جاسار ۇل بيىكتەن سەكىرىپ كەتتى. ءبىرى كوپقاباتتى ۇيدەن، ەكىنشىسى كوپىردەن قۇلاعان، - دەپ حابارلادى جاسۇلان بيسەمبيەۆ.

ونىڭ ايتۋىنا قاراعاندا، جاسوسپىرىمدەردىڭ سۋيتسيد جاساۋ سەبەبىنە تالداۋ جۇرگىزىلگەن.

— تالداۋ كورسەتكەندەي، كوز جۇمعان بالالاردىڭ باسىم كوپشىلىگى — تولىق ءارى اۋقاتتى وتباسىنان. الايدا جۇرگىزىلگەن زەرتتەۋلەرگە سايكەس، مۇنداي ارەكەتكە اتا- اناسىمەن، كەيدە دوستارىمەن كەلىسپەي قالعان بالالار بەيىم ەكەن. سوندىقتان، اتا- انالار بالاسىمەن مەيىلىنشە اشىق سويلەسكەنى ءجون. ولارمەن كوبىرەك ۋاقىت وتكىزىپ، سىرلاسىنا اينالۋى كەرەك، - دەپ ءمالىم ەتتى جاسۇلان بيسەمبيەۆ.

اكىم ورىنباسارىنىڭ دەرەگىنە سۇيەنسەك، جەرگىلىكتى بيلىك مەكتەپتەردەگى پسيحولوگتاردىڭ وقۋشىلارمەن جۇمىسىن كۇشەيتكەلى وتىر.

وبلىستىق ءبىلىم باسقارماسى جانىنان جاسوسپىرىمدەردى پسيحولوگيالىق قولداۋ ورتالىعىن اشىلادى.

بۇل ورتالىقتا ەموتسيونالدىق تۇراقسىزدىققا تاپ بولعان بالالارعا ادىستەمەلىك قولداۋ كورسەتىلەدى. سونداي- اق، ارنايى call-center ىسكە قوسىلادى.

ەسكە سالا كەتەلىك، بۇدان بۇرىن اتىراۋدا 15-قاباتتىڭ بالكونىنان سەكىرۋگە وقتالعان ايەل قۇتقارىلعانىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى