اتىراۋدا اۋداندىق سوتتىڭ سۋدياسى 2,5 ميلليون تەڭگە پارامەن ۇستالدى
اتىراۋ. KAZINFORM - اتىراۋ وبلىسىندا سۋديانىڭ الاياقتىق ءىس- ارەكەتى اشكەرە بولدى.
2024-جىلعى 10- قاڭتاردا اتىراۋ وبلىسى ماحامبەت اۋداندىق سوتىنىڭ سۋدياسىنا ءىس قوزعالعان.
ول قىلمىس كودەكسىنىڭ 190-بابى 3-بولىگى 2-تارماعى، ياعني الاياقتىق ءىس-ارەكەتى ءۇشىن ايىپتالىپ وتىر.
ماتەريال سوتقا دەيىنگى تەرگەپ-تەكسەرۋدىڭ ءبىرىڭعاي تىزىلىمىنە تىركەلدى.
«ۇلتتىق قاۋىپسىزدىك كوميتەتى وبلىس بويىنشا دەپارتامەنتىنىڭ قىزمەتكەرلەرى سوت اكىمشىلىگى دەپارتامەنتىنىڭ ىشكى قاۋىپسىزدىك بولىمىمەن بىرلەسە وتىرىپ، 15 قاڭتاردا سۋديانى 2,5 ميلليون تەڭگەنى الۋ كەزىندە پارامەن ۇستادى» دەپ مالىمدەدى اتىراۋ وبلىستىق سوتىنىڭ باسپا ءسوز قىزمەتى.
كۇدىكتىگە پروتسەستىك ماجبۇرلەۋ شاراسى قولدانىلماعان.
قازىرگى ۋاقىتتا ەكى ۆەدومستۆونىڭ بىرلەسكەن ءىس-ارەكەتىمەن سوتقا دەيىنگى تەرگەپ-تەكسەرۋ جالعاسىپ جاتىر.
