اتىراۋدا 62 ەرلى-زايىپتى اجىراسۋعا ارىز بەرىپ، كەيىن تاتۋلاسىپ كەتكەن
بيىل اتىراۋداعى اقپاراتتىق- قۇقىقتىق كەڭەس بەرۋ ورتالىعىنا 510 وتباسى وتباسىلىق پسيحولوگتىڭ كومەگىنە جۇگىنگەن. ونىڭ ىشىندە 62 وتباسى قايتا تاتۋلاسقان، - دەپ حابارلايدى «موي گورود» پورتالى.
ورتالىق مامىر ايىنان بەرى ىشكى ساياسات باسقارماسىنىڭ تاپسىرىسى نەگىزىندە «شاڭىراق-2008» جوباسى اياسىندا جۇمىس ىستەپ كەلەدى. مۇندا ەكى زاڭگەر، ەكى پسيحولوگ جانە مەدياتور قىزمەت اتقارادى.
«ءىرى ساۋدا ورتالىقتارىندا وتكەن اشىق ەسىك كۇندەرى اياسىندا 68 ادامعا تەگىن كەڭەس بەرىلگەن. جوبانىڭ جۇزەگە اسىرىلۋ مەرزىمى ءۇش جىلدى قامتيدى. ءبىر جىلدان استام ۋاقىت جۇمىس ىستەپ كەلە جاتقان جوبا قازىردىڭ وزىندە وڭ ناتيجەسىن كورسەتىپ ءجۇر. ماسەلەن، الەۋمەتتىك وسال توپتارداعى كەيبىر ازاماتتار سوتقا جۇگىنىپ، زاڭگەرلەردەن تەگىن كومەك الا الدى، - دەيدى «شاڭىراق-2008» قوعامدىق بىرلەستىگىنىڭ جەتەكشىسى جانار ءىلياسوۆا.
جىل باسىنان بەرى ورتالىقتان ەكى مىڭعا جۋىق ادام كومەك العان. ونىڭ ىشىندە 510 وتباسى پسيحولوگتىڭ كومەگىنە جۇگىنىپ، 62 ەرلى-زايىپتى قايتا تاتۋلاسقان.
