اتىراۋعا وزگە ەلدەن كەلگەن 11 ادامعا بوسقىن مارتەبەسى بەرىلگەن
اتىراۋ وبلىسىندا بوسقىن مارتەبەسىن الۋ ءۇشىن وزگە ەلدىڭ 96 ادامى ءوتىنىش بىلدىرگەن. الايدا، ولاردىڭ اراسىنان 11 ادامعا بوسقىن مارتەبەسىن بەرۋگە شەشىم قابىلدانعان، دەپ حابارلايدى Kazinform.
اتىراۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ازامات مامبەتوۆتىڭ ايتۋىنشا، بوسقىن مارتەبەسىن الۋعا ءوتىنىش بەرگەن ازاماتتار قاتاڭ باقىلاۋعا الىنعان.
«بيىل 1-جەلتوقسانعا دەيىن باسقارماعا بوسقىن مارتەبەسىن الۋ ءۇشىن 96 ادامنان ءوتىنىش ءتۇستى. پانا ىزدەپ كەلگەندەردىڭ اراسىنان 11 ادامعا بوسقىن مارتەبەسى بەرىلدى. ال، 55 ادامنىڭ بوسقىن مارتەبەسىنە بەرگەن ءوتىنىشى قايتارىلىپ، ولار ەلدەرىنە ورالدى. ءوتىنىش بەرگەن 4 ادام ىقتيارحات الدى»، - دەپ حابارلادى ازامات مامبەتوۆ.
ونىڭ دەرەگىنە قاراعاندا، 11 ادامنىڭ باسقا وڭىرگە كوشىپ كەتكەنى انىقتالعان. سونداي- اق 9 ادام ەلدىڭ اۋماعىنان ەسكەرتۋسىز شىعىپ كەتكەن.
«پانا ىزدەگەن ادام رەتىندە 6 ادام تىركەلدى. ونىڭ ىشىندە 1 ەر، 3 ايەل، كامەلەتكە تولماعان 2 بالا بار. ولاردىڭ ءبارى - ۋكراينا رەسپۋبليكاسىنىڭ ازاماتتارى»، - دەپ ءمالىم ەتتى ازامات مامبەتوۆ.
ەسكە سالا كەتەلىك، بۇعان دەيىن بيىل اتىراۋ وبلىسىنا شەتەلدەن 272 ەتنيكالىق قازاق كوشىپ كەلگەنىن حابارلاعان ەدىك.
باسقارمانىڭ باسپا ءسوز قىزمەتىنەن ءمالىم ەتكەندەي، قانداستاردىڭ باسىم بولىگى - 171 وتباسىنداعى 218 قازاق وزبەكستان رەسپۋبليكاسىنان كەلگەن. رەسەي فەدەراتسياسىنان 35 وتباسى (44 ادام)، قىتاي حالىق رەسپۋبليكاسىنان 1 وتباسى (1 ادام)، تۇركىمەنستان رەسپۋبليكاسىنان 3 وتباسى (7 ادام) جانە مونعوليا رەسپۋبليكاسىنان 2 وتباسى (2 ادام) اتامەكەنگە ورالعان.
قانداستار اتىراۋ قالاسىنا، جىلىوي، ماقات جانە يندەر اۋدانىنا قونىستانعان.
اۆتور
جولداسبەك شوپەعۇل
