اتىراۋ وبلىسىنداعى قىزىل ءۇي اۋىلىنىڭ تۇرعىندارى ىشىمدىكتەن باس تارتتى

قىزىل ءۇي - يساتاي اۋدانىنداعى تۇشىقۇدىق اۋىلدىق وكرۋگىنە قارايتىن شاعىن ەلدى مەكەن. الايدا وكرۋگكە ەمەس، اۋدان ورتالىعى - اققىستاۋ اۋىلىنا جاقىن ورنالاسقان. بۇل اۋىلمەن اراقاشىقتىق - 28 شاقىرىم.

ەلدى مەكەندە 2009 -جىلى 347 ادام تۇرعان. ونىڭ ىشىندە 183 ەر، 164 ايەل بولعان ەكەن. الايدا 2021 -جىلعى ساناقتىڭ قورىتىندىسىمەن تۇرعىندار سانى ازايعانى بايقالعان. سول جىلعى ساناقتىڭ قورىتىندىسىمەن تۇرعىنداردىڭ سانى 244 (132 ەر، 112 ايەل) ادامدى قۇراعان.

تۇشىقۇدىق اۋىلدىق وكرۋگىنىڭ اكىمى ايباتىر بەكىش ۇلىنىڭ ايتۋىنشا، اتالعان ەلدى مەكەننىڭ ىرگەتاسى 1913 -جىلى قالانعان. سول كەزدە العاشقى عيمارات قىزىل ساز بالشىق تاستان سالىنعان. قىزىل ءۇي اتاۋى سوعان بايلانىستى قويىلعان. كەيىن ۇجىمشار مەن كەڭشاردىڭ فەرما ورتالىعى بولعان.

- قازىر قىزىلۇيدە 265 ادام، ونىڭ ىشىندە 145 ەر، 120 ايەل تۇرادى. تۇرعىندار اراسىندا 38 زەينەتكەر، مەكتەپكە دەيىنگى جاستاعى 37 بالا، 30 وقۋشى بار. ەلدى مەكەن تۇرعىندارى ءۇشىن 2018 -جىلى سۋ قۇبىرى تارتىلىپ، ءار ءۇي تازا اۋىز سۋمەن قامتىلدى. ال بىلتىر تابيعي گاز جەلىسى ىسكە قوسىلدى، - دەيدى ايباتىر بەكىش ۇلى.

ەلدى مەكەندە تىركەلگەن 33 شارۋا قوجالىعىندا 1613 ءمۇيىزدى ءىرى قارا، 2271 قوي، 492 ەشكى، 1240 -جىلقى، 592 تۇيە ەسەپكە الىنعان. ال تۇرعىنداردىڭ جەكە يەلىگىندە 448 سيىر، 404 قوي، 255 ەشكى، 226 -جىلقى، 264 تۇيە بار.

- بولاشاق - كەلەشەك ۇرپاقتىڭ قولىندا. ال جاس بۋىننىڭ تەرىس ادەتتەن، ونىڭ ىشىندە الكوگولدىك ىشىمدىكتەن اۋلاق بولعانىن قالايمىز. وسى ماقساتتى كوزدەگەن قىزىل ءۇي ەلدى مەكەنىنىڭ تۇرعىندارى ىشىمدىكسىز اۋىل باستاماسىنا قولداۋ ءبىلدىردى. بۇل باستامانىڭ استارىندا تەك تۇرعىنداردىڭ قاۋىپسىزدىگىن ساقتاۋ عانا ەمەس، ۇلتتىق قۇندىلىقتار مەن مادەنيەتتى جاڭعىرتۋ، رۋحاني تازالىقتى ۇلگى ەتۋ ماسەلەسى بار. اۋىلداعى بەرەكە مەن بىرلىك، ءتارتىپ پەن تىنىشتىق - وسى ۇستانىمنىڭ جەمىسى. قىزىل ءۇي تۇرعىندارىنىڭ باستاماسى ىشىمدىكسىز، سانالى قوعام قۇرۋ جولىنداعى باتىل ءارى ماڭىزدى قادام رەتىندە وزگە اۋىلدارعا ۇلگى بولادى، - دەيدى ايباتىر بەكىش ۇلى.

وكرۋگ اكىمىنىڭ ايتۋىنا قاراعاندا، قىزىل ءۇي ەلدى مەكەنىندەگى سوڭعى 5 جىلدا بىردە-ءبىر قىلمىس تىركەلمەگەن. اۋداندىق پوليتسيا بولىمىنە ماس كۇيدە قۇقىق بۇزۋشىلار جەتكىزىلمەگەن. دۇكەندە ىشىمدىك ساتىلمايدى.

- بۇل ەلدى مەكەندە 1986 -جىلى باستاۋىش مەكتەپ اشىلعان ەدى. بالا سانىنىڭ كوبەيۋىنە بايلانىستى 1990 -جىلى نەگىزگى مەكتەپكە اينالدى. 2019 -جىلى 80 ورىندىق ەكى قاباتتى مەكتەپتىڭ جاڭا عيماراتى پايدالانۋعا بەرىلدى. قازىر ءبىلىم ورداسىندا 30 وقۋشى ءدارىس الادى، - دەپ ءمالىم ەتتى ايباتىر بەكىش ۇلى.

سونداي-اق اۋىلدا فەلدشەرلىك پۋنكت، كلۋب مەن كىتاپحانا جۇمىس ىستەيدى.

ەسكە سالا كەتەلىك، بۇدان بۇرىن اتىراۋداعى قۇرىلىس اۋىلىنىڭ تۇرعىندارى 5 جىل بۇرىن ىشىمدىكتەن باس تارتقانىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى