اتىراۋ وبلىسىندا جىل باسىنان بەرى 753 ادام كولىك جۇرگىزۋ كۋالىگىنەن ايىرىلدى
اتىراۋ وبلىسىندا جىل باسىنان بەرى 753 ادامعا كولىك جۇرگىزۋ كۋالىگىنەن ايىرۋ جازاسى تاعايىندالدى، دەپ حابارلايدى Kazinform.
اتىراۋ وبلىستىق سوتى قىلمىستىق ىستەر جونىندەگى اپەللياتسيالىق سوت القاسىنىڭ ءتوراعاسى ءتاتتى ۋاليەۆانىڭ ايتۋىنشا، جۇرگىزۋشىلەرگە مۇنداي جازانى تاعايىنداۋدىڭ بىرنەشە سەبەبى بار.
- بىرىنشىدەن، جۇرگىزۋشىلەر كولىك قۇرالىن الكوگولدىك، ەسىرتكىلىك جانە ۋىتقۇمارلىق ماساڭ كۇيدە جۇرگىزگەنى انىقتالىپ وتىر. ەكىنشىدەن كولىكتى وسىنداي كۇيدەگى ادامداردىڭ جۇرگىزۋىنە جول بەرىلگەن. بيىل 527 ادامنىڭ تاراپىنان ق ر اكىمشىلىك قۇقىق بۇزۋشىلىق تۋرالى كودەكسىنىڭ 608-بابىندا كوزدەلگەن تالاپتى بۇزۋ دەرەگى تىركەلىپ وتىر. ۇشىنشىدەن، 596-بابىنا سايكەس كولىك قۇرالىن جولدىڭ ءجۇرۋ بولىگىندە ورنالاستىرۋ، قارسى ءجۇرىپ ءوتۋ نەمەسە باسىپ وزۋ قاعيدالارىن بۇزعان 108 ادام دا جۇرگىزۋشى كۋالىگىنەن ايىرىلدى، - دەدى ءتاتتى ۋاليەۆا.
ونىڭ مالىمەتىنە سۇيەنسەك، 85 جۇرگىزۋشى اتالعان كودەكستىڭ 590، 610، 611 جانە 613-بابىمەن، 33 ادام ق ر قىلمىستىق كودەكستىڭ 345-بابىمەن كىنالى دەپ تانىلعان.
ەسكە سالا كەتەلىك، اتىراۋدا ءبىر ايدا ايىپپۇلىن تولەمەي جۇرگەن 1 مىڭ جۇرگىزۋشى ۇستالعانىن حابارلاعان بولاتىنبىز.
