اتىراۋ وبلىسىندا شارۋا قوجالىعىنىڭ جۇمىسشىسىنا قاسقىر شاپتى
اتىراۋ. KAZINFORM - اتىراۋ وبلىسىندا شارۋا قوجالىعىنىڭ جۇمىسشىسىنا قاسقىر شاۋىپ، قولىن تىستەپ العان. ەر ادام قولىنان جاراقاتتانعان.
وقيعا كەشە، 19-جەلتوقساندا يندەر اۋدانىنداعى ەلتاي اۋىلدىق وكرۋگىنىڭ اۋماعىندا ورنالاسقان كوكتوبە قىستاعىندا بولعان. مۇندا «بەكزات» شارۋا قوجالىعىنىڭ مالشىلارى قونىستانعان.
اۋىلدىق وكرۋگ ۆەتەرينارى امانتاي مۇقاتوۆتىڭ دەرەگىنە سۇيەنسەك، قوجالىق جۇمىسشىسى بولات ساريەۆ مالعا ءشوپ سالۋ ءۇشىن اۋلاعا كىرگەن. سول كەزدە وعان ءتۇز تاعىسى شاپقان.
- قاسقىر بولات ساريەۆتىڭ قولىن تىستەپ العان. ونىڭ قولىندا قاسقىر ءتىسىنىڭ ءىزى بار. ول قاسقىرمەن الىسقان ساتتە ءىنىسى امانجول دەرەۋ جەتكەن. ەكەۋى قاسقىردى ۇرىپ ولتىرگەن، - دەدى امانتاي مۇقاتوۆ.
ۆەتەريناردىڭ ايتۋىنشا، قاسقىردىڭ باسى وبلىستىق ۆەتەرينارلىق زەرتحاناعا تاپسىرىلعان. ال ولەكسەسى سانيتارلىق تالاپقا ساي ورتەلىپ، كەيىن كومىلگەن.
ءتۇز تاعىسى تىستەگەن بولات ساريەۆ اۋدان ورتالىعى - يندەربور كەنتىندەگى اۋرۋحانادا امبۋلاتوريالىق ەم قابىلداپ جاتىر.
جاراقات العان بولات ساريەۆتىڭ بالاسى الەۋمەتتىك جەلىدە قاسقىر تۇسىرىلگەن ۆيدەونى جۇكتەدى.
ونىڭ ايتۋىنا قاراعاندا، ەكى-ءۇش كۇن بۇرىن ءدال وسىنداي وقيعا ىنتىماق اۋىلىندا دا بولعان.
ەسكە سالا كەتەلىك، بۇدان بۇرىن جىل باسىندا اتىراۋداعى اۋىل ماڭىندا قاسقىر جۇرگەنىن حابارلاعان بولاتىنبىز.
