اتى ەسىمدە جوق. ادامنىڭ ەسىمىن قالاي جىلدام جاتتاپ الۋعا بولادى؟
استانا. قازاقپارات - كەي ادامداردىڭ ەسىمدەردى ەستە ساقتاۋى ناشار. مىسالى، تانىس ادامىڭىزدى كەزدەستىرىپ قالدىڭىز، ءبىراق اتى ەسىڭىزگە تۇسپەي قالادى.
نەمەسە جاڭا عانا بىرەۋمەن تانىستىڭىز جانە ونىڭ ەسىمىن بىردەن ۇمىتىپ قالدىڭىز. مۇنداي جاعدايلار كەز كەلگەن جەردە - مەرەكەلىك كەشتەردە، ىسكەرلىك كەزدەسۋلەردە نەمەسە جاڭا جۇمىس ورنىندا بولۋى مۇمكىن.
نەلىكتەن ءبىز ەسىمدەردى ەستە ساقتامايمىز؟
بىرەۋدى العاش رەت كەزدەستىرگەن كەزدە ءبىزدىڭ زەيىنىمىز كوپتەگەن فاكتورلارعا، مىسالى، بەتىنە، ونىڭ سىرت كەلبەتىنە، داۋىسىنا، ىم-يشاراسىنا نەمەسە سول كەزدەگى اينالاداعى جاعدايعا اۋىپ كەتەدى. اقپاراتتىڭ كوپ بولۋى كەيدە الدىمىزدا تۇرعان ادامنىڭ اتىنا ءمان بەرمەۋگە نەمەسە ونى ەسكە تۇسىرە الماۋعا اكەلەدى.
ادامداردىڭ ەسىمىن ءبىلۋ ماڭىزدى ما؟
بۇل ادامدى وزىڭىزگە قاراتۋدىڭ ەڭ قاراپايىم جولى. وعان قوسا، ءار ادام ءوز ەسىمىن ەستىگەن كەزدە ونى تانيتىنىن جانە ەستە ساقتاپ قالعانىن بىلەدى، بۇل وعان جاعىمدىلىق سىيلايدى. سوندىقتان كوپتەگەن ليدەرلەر ادامنىڭ ەسىمدەرىنە اسا ءمان بەرىپ، ولاردى بارىنشا قولدانۋعا تىرىسادى.
ىسكەرلىك قارىم- قاتىناستا نەمەسە كليەنتتەرمەن جۇمىس ىستەۋدە دە اڭگىمەلەسۋشىنىڭ ەسىمىن ەستە ساقتاۋ ماڭىزدى. ايتپەسە، ءسىز ونىڭ الدىندا زەيىنسىز، تىڭداۋ بىلمەيتىن، ءوزىن نەمەسە ءوز پروبلەمالارىن ويلاپ وتىراتىن، اڭگىمەلەسۋشىگە نەمقۇرايلى قارايتىن ادام سەكىلدى كورىنىپ قالۋىڭىز ابدەن مۇمكىن. سونداي-اق ادامنىڭ ەسىمىن ەستە ساقتاۋ سىزگە سەنىمدىلىك سىيلايدى. ەندەشە، ەسىمدەردى قالاي تەز جاتتاپ الۋعا بولادى؟
ەسىمدى قايتالاڭىز
بىرەۋمەن تانىسقان كەزدە ءوز ەسىمىڭىزدى ايتىپ، اڭگىمەنى جالعاستىرىپ كەتپەي تۇرىپ، ونىڭ ەسىمىن قايتالاپ ايتىڭىز. مىسالى، ەگەر ونىڭ اتى جاندوس بولسا، ءسىز بىلاي دەي الاسىز: "جاندوس، تانىسقانىما قۋانىشتىمىن" نەمەسە "جاندوس، ءسىز سوندا قارجى سالاسىندا جۇمىس ىستەيسىز با؟".
سونداي- اق اڭگىمەلەسۋ كەزىندە دە ونىڭ ەسىمىن بىرنەشە رەت قولدانۋعا بولادى، ءبىراق ارينە، وتە ءجيى ەمەس. ونىمەن سويلەسكەن كەزدە كوزىنە تىكە قاراڭىز: ءسىزدىڭ ميىڭىزدا ونىڭ ەسىمى مەن ءتۇرى بىرگە ساقتالۋى كەرەك.
جازىپ الىڭىز
ەگەر سىزدە ۆيزۋالدى ەستە ساقتاۋ دامىعان بولسا، تانىسقان ادامىڭىزدىڭ ەسىمىن قاعازعا جازىپ الىڭىز. اسىرەسە، ەرەكشە جانە سيرەك كەزدەسەتىن ەسىمدەردى سولاي جازىپ العان دۇرىس. سونداي- اق ادامنىڭ ۆيزيت كارتاسىن سۇراۋعا بولادى.
اسسوتسياتسيالار پايلانىڭىز
جاڭا ەسىم ەستىگەن كەزدە قيالىڭىزدا سول ەسىممەن سوزدىك بايلانىس نەمەسە سۋرەت جاساۋعا بولادى. بۇل ول ادام جايلى ءسىز بىلەتىن كەز كەلگەن فاكت، مىسالى، اۋەستىگى، اينالىساتىن ءىسى، تۇراتىن جەرى بولۋى مۇمكىن.
بايلانىستار مەن ۇقساستىقتار تابۋ
جاڭا تانىسقان ادامىڭىزدى ەسىمى سونداي ءوزىڭىزدىڭ تانىسىڭىزبەن ۇقساستىرىڭىز. نەمەسە سونداي ەسىمدى تانىمال ادامدارمەن سايكەستەندىرۋگە بولادى. مىسالى، روزا ەسىمدى ايەلمەن تانىسساڭىز، ونى روزا رىمبايەۆامەن سايكەستەندىرۋىڭىزگە بولادى. بۇل باستاپقىدا قيىن سەكىلدى كورىنۋى مۇمكىن، ءبىراق قايتالاي بەرسەڭىز، ادامدار اراسىندا وسىنداي بايلانىستى جىلداپ تاۋىپ، ەسىمدەرىن تەز جاتتايتىن بولاسىز.
نازار اۋدارۋ
ادام اتىن ەستە ساقتاماۋدىڭ ەڭ نەگىزگى سەبەپتەرىنىڭ ءبىرى - سول ادامعا ءمان بەرمەۋ، زەيىنىڭىزدىڭ اينالاداعى باسقا نارسەلەرگە اۋىپ كەتۋى. سوندىقتان بىرەۋمەن تانىسقان كەزدە بار زەيىنىڭىزدى سول ادامعا ءبولىڭىز، سول كەزدە ونىڭ ەسىمىن دە جىلداپ ساقتاپ قالاسىز.
دەرەككوز: massaget.kz
