اۆتومەكتەپ جالعان جۇرگىزۋشى كۋالىگىن تاراتتى دەگەن كۇدىككە ءىلىندى
اتىراۋدا جالعان جۇرگىزۋشى كۋالىگىن بەرۋ كۇدىگىمەن اۆتومەكتەپتەردىڭ بىرىندە تەكسەرۋ باستالدى، دەپ حابارلايدى Kazinform.
وبلىستىق پوليتسيا دەپارتامەنتىنىڭ باستىعى، پوليتسيا پولكوۆنيگى نۇرحات ورازبايەۆتىڭ ايتۋىنشا، بۇل تۋرالى الەۋمەتتىك جەلىدە بەينەجازبا تارالعان.
- اتىراۋ قالاسىنىڭ تۇرعىنى اۆتومەكتەپتەردىڭ بىرىندە كولىك جۇرگىزۋدى وقىتۋ تۋرالى جالعان كۋالىك بەرۋدە دەپ شاعىمداندى. اتالعان دەرەككە بايلانىستى اتىراۋ وبلىستىق پوليتسيا دەپارتامەنتىنىڭ قىزمەتكەرلەرى ق ر قىلمىستىق كودەكسىنىڭ 385-بابىنىڭ 1-بولىگىمەن (قۇقىقتار بەرەتىن نەمەسە مىندەتتەردەن بوساتاتىن كۋالىكتى نەمەسە وزگە دە رەسمي قۇجاتتى قولدان جاساۋ، نە مۇنداي قۇجاتتى وتكىزۋ، سول سياقتى قولدان جاسالعان ءمورتابانداردى، مورلەردى، بلانكىلەردى، مەملەكەتتىك پوشتا تولەمى بەلگىلەرىن، قازاقستان رەسپۋبليكاسىنىڭ نەمەسە ك س ر و-نىڭ مەملەكەتتىك ناگرادالارىن دايىنداۋ نەمەسە وتكىزۋ) سوتقا دەيىنگى تەرگەپ-تەكسەرۋدى باستادى، - دەپ ءمالىم ەتتى نۇرحات ورازبايەۆ.
ونىڭ ايتۋىنا قاراعاندا، قازىر قاجەتتى تەرگەۋ امالدارى جۇرگىزىلىپ جاتىر.
سوتقا دەيىنگى تەرگەۋدىڭ قورىتىندىسىمەن اۆتومەكتەپ قىزمەتكەرلەرىنىڭ ارەكەتىنە قۇقىقتىق باعا بەرىلەدى.
ەسكە سالا كەتەلىك، بۇدان بۇرىن اتىراۋدا مەملەكەتتىك تۋدى قوقىسقا تاستاۋعا بايلانىستى تەرگەۋ باستالعانىن حابارلاعان بولاتىنبىز.
