اتوم ەنەرگياسى جونىندەگى اگەنتتىك قۇرىلدى - جارلىق

قازاقستان رەسپۋبليكاسى كونستيتۋتسياسىنىڭ 44-بابىنىڭ 5) تارماقشاسىنا سايكەس اتوم سالاسىن ودان ءارى دامىتۋ جانە يادرولىق قاۋىپسىزدىكتى نىعايتۋ ماقساتىندا قاۋلى ەتەمىن:

1. قازاقستان رەسپۋبليكاسى ەنەرگەتيكا مينيسترلىگىنىڭ ۋران ءوندىرۋ بولىگىندە جەر قويناۋىن پايدالانۋ، اتوم ەنەرگياسىن پايدالانۋ، حالىقتىڭ رادياتسيالىق قاۋىپسىزدىگىن قامتاماسىز ەتۋ، سەمەي يادرولىق قاۋىپسىزدىك ايماعىن قۇرۋ جانە ونىڭ جۇمىس ىستەۋى سالالارىنداعى فۋنكسيالارىن جانە وكىلەتتىكتەرىن بەرە وتىرىپ، قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگان رەتىندە قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى (بۇدان ءارى - اگەنتتىك) قۇرىلسىن.

2. اگەنتتىك بەرىلەتىن فۋنكسيالار مەن وكىلەتتىكتەر شەگىندە قازاقستان رەسپۋبليكاسى ەنەرگەتيكا مينيسترلىگىنىڭ قۇقىقتارى مەن مىندەتتەمەلەرىنىڭ قۇقىقتىق ميراسقورى بولىپ ايقىندالسىن.

3. «قازاقستان رەسپۋبليكاسى پرەزيدەنتىنىڭ اكىمشىلىگى تۋرالى ەرەجەنى بەكىتۋ تۋرالى» قازاقستان رەسپۋبليكاسى پرەزيدەنتىنىڭ 2008-جىلعى 11-ناۋرىزداعى 552-جارلىعىنا مىناداي تولىقتىرۋ ەنگىزىلسىن:

جوعارىدا اتالعان جارلىقپەن بەكىتىلگەن قازاقستان رەسپۋبليكاسىنىڭ پرەزيدەنتىنە تىكەلەي باعىناتىن جانە ەسەپ بەرەتىن مەملەكەتتىك ورگانداردىڭ تىزبەسىندە مىناداي مازمۇنداعى جولمەن تولىقتىرىلسىن:

«قازاقستان رەسپۋبليكاسىنىڭ اتوم ەنەرگياسى جونىندەگى اگەنتتىگى».

4. قازاقستان رەسپۋبليكاسى پرەزيدەنتىنىڭ اكىمشىلىگى:

1) قازاقستان رەسپۋبليكاسى پرەزيدەنتىنىڭ قاراۋىنا:

اگەنتتىك توراعاسىمەن بىرلەسىپ اگەنتتىك تۋرالى ەرەجەنىڭ جانە ونىڭ قۇرىلىمىنىڭ جوبالارىن؛

قازاقستان رەسپۋبليكاسىنىڭ ۇكىمەتىمەن بىرلەسىپ قازاقستان رەسپۋبليكاسىنىڭ ەنەرگەتيكا مينيسترلىگىنەن جانە ءتيىستى ۆەدومستۆولىق باعىنىستى ۇيىمداردان شتات سانىن اگەنتتىككە قايتا ءبولۋ جونىندەگى ۇسىنىستاردى ەنگىزسىن؛

2) وسى جارلىقتى ىسكە اسىرۋ جونىندە وزگە دە شارالاردى قابىلداسىن.

5. قازاقستان رەسپۋبليكاسىنىڭ ۇكىمەتى:

1) قازاقستان رەسپۋبليكاسى پرەزيدەنتى اكىمشىلىگىنىڭ كەلىسۋى بويىنشا قازاقستان رەسپۋبليكاسى ەنەرگەتيكا مينيسترلىگىنىڭ جانە ءتيىستى ۆەدومستۆولىق باعىنىستى ۇيىمداردىڭ شتات سانىن قايتا ءبولۋدى؛

2) وسى جارلىقتى ىسكە اسىرۋ جونىندە وزگە دە شارالاردىڭ قابىلدانۋىن قامتاماسىز ەتسىن.

6. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

7. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.

ايتا كەتەلىك بۇگىن مەملەكەت باسشىسى قاۋىپسىزدىك كەڭەسىنىڭ وتىرىسىن وتكىزگەن ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى