ۆاتساپ ارقىلى ادامداردى الدايتىن الاياقتارعا sim-كارتا ساتقاندار ۇستالدى
تالدىقورعان. KAZINFORM - جەتىسۋ وبلىسى جانە استانا قالاسى پوليتسيا دەپارتامەنتتەرىنىڭ قىزمەتكەرلەرى ءى ءى م كيبەرقىلمىسقا قارسى ءىس-قيمىل دەپارتامەنتىنىڭ ۇيلەستىرۋىمەن ينتەرنەت-الاياقتىققا قاتىسى بار قىلمىستىق توپتىڭ جولىن كەسۋ بويىنشا وپەراتسيانى ءساتتى جۇرگىزدى، - دەپ حابارلادى Polisia.kz.
ينتەرنەت-الاياقتىقپەن بايلانىستى قىلمىستىق ىستەردى تەرگەۋ بارىسىندا قىلمىس جاساۋ ءۇشىن پايدالانىلعان كوپتەگەن sim-كارتانىڭ ىسكە قوسىلعان ورنى انىقتالدى. جەدەل- ىزدەستىرۋ ءىس- شارالارىنىڭ ناتيجەسىندە جەتىسۋ وبلىسىنىڭ 24 جانە 25 جاستاعى ەكى تۇرعىنى ۇستالدى.
ولاردىڭ ءبىرى جامبىل اۋىلىندا، ەكىنشىسى قاراتال اۋدانىنىڭ دوستىق اۋىلىندا تۇرعان. كۇدىكتىلەر sim-كارتالاردى ىسكە قوسىپ، whatsapp مەسسەندجەرىنە تىركەلىپ، قازاقستان ازاماتتارىن الداۋمەن اينالىساتىن الاياقتارعا ساتقان.
قىلمىس كەلەسى سحەما بويىنشا جۇزەگە اسىرىلعان: قاسكويلەر وزدەرىنىڭ جەكە دەرەكتەرىن پايدالانىپ، Tele2 قوسىمشاسى ارقىلى ابونەنتتىك نومىرلەردى تىركەگەن. سودان كەيىن باسقا قوسىمشالاردىڭ كومەگىمەن نومىرلەردى ىسكە قوسىپ، ولاردى Telegram-كانالدار ارقىلى 500 دەن 1500 تەڭگەگە دەيىنگى باعامەن ساتقان.
كۇنىنە 100-گە دەيىن sim-كارتا تىركەگەن. ءتىنتۋ بارىسىندا ۇستالعانداردان 17 ۇيالى تەلەفون، ەكى نوۋتبۋك، ءبىر مودەم جانە 1000 عا جۋىق sim-كارتا تاركىلەندى.
تەرگەۋ جالعاسىپ جاتىر. ۇستالعانداردىڭ باسقا الاياقتارمەن بايلانىسى تەكسەرىلىپ جاتىر.
جەتىسۋ وبلىسىندا بىرنەشە مارتە الاياقتىق جاساعان ايەل سوتتالعانىن جازعان بولاتىنبىز.
