«اتامەكەن» باسشىسى قازاقستاندىق كومپانيالارعا سانكسيا قاۋپى بار ەكەنىن مويىندادى
«اتامەكەن» ۇلتتىق كاسىپكەرلەر پالاتاسىنىڭ ءتورالقا ءتوراعاسى رايىمبەك باتالوۆ قازاقستاندىق كومپانيالاردىڭ سانكسياعا ءتۇسۋ قاۋپى تۋرالى پىكىر ءبىلدىردى، دەپ حابارلايدى Kazinform.
«قازاقستاندا جۇمىس ىستەپ جاتقان كومپانيالاردىڭ باسىم بولىگى تەحنولوگيا ترانسفەرتتەۋ جانە ەكسپورتتاۋ باعىتىندا جۇمىس ىستەۋگە دايىن دەپ ەسەپتەيمىز. بۇل جەردە باقىلاۋ جۇيەسىنىڭ ايقىن بولعانى ماڭىزدى. وكىنىشكە قاراي، كەيبىر مىسالدار بار. اعاش ۇنتاعىنان جەلىمدەلەتىن تاقتاي تۇرلەرىنە بايلانىستى، باسقا دا وندىرىسپەن بايلانىستى مىسالدار. سولار سانكتسيا تالاپتارىن بۇزسا كەرەك. ءبىراق بۇل ماسەلەنىڭ ءۇش جاعى بار. ونىڭ ىشىنە مەملەكەت تاراپىنان جاسالاتىن باقىلاۋ دا جاتادى. سانكتسيا تالاپتارىن بۇزعانى تۋرالى قورىتىندى جاساۋعا نەگىز بولاتىن ەرەجەلەر دە ماڭىزدى. سوندىقتان بىزگە باقىلاۋ جۇمىسىن قاتاڭداتۋ، بيزنەس پەن ءوندىرىستىڭ ۇلكەن بولىگىن وسىندا شوعىرلاندىرۋ بويىنشا جۇمىس ىستەۋ كەرەك. سوندا بىزگە قارسى ەشقانداي ءۋاج ايتىلماس ەدى. ارينە، يمپورت وپەراتسيالارى بار. قىتايدان الىپ، كورشى ەلدەرگە، سونىڭ ىشىندە رەسەي فەدەراتسياسىنا دا ەكسپورتتالۋى مۇمكىن. ءبىراق بۇل جەردە ماسەلەنىڭ ەكى ۇشى بار. باقىلاۋ جانە بيزنەسپەن جۇمىس» ، - دەدى رايىمبەك باتالوۆ «قازاقستاندىق قۇرام 2.0» حالىقارالىق فورۋمىندا باق وكىلدەرىنە بەرگەن سۇحباتىندا.
«اتامەكەن» باسشىسى وتاندىق بيزنەس سانكتسيا تۇسپەۋ ءۇشىن ءتۇرلى فورماتتاعى كەزدەسۋلەر وتكىزىپ، ءتۇسىندىرۋ جۇمىستارى جۇرگىزىلىپ جاتقانىن اتاپ ءوتتى. ونىڭ پايىمىنشا، كەيبىر كومپانيالار اقپاراتتىڭ جوقتىعىنان دا سانكتسيا قاتەرىنە ۇشىراۋى مۇمكىن.
«سانكسياعا كوبىنە قىرعىز كومپانيالارى تاپ بولدى. بىزدىكىلەر دە بار، ءبىراق از. سانكتسيا ءقاۋپى بار، ونى جوققا شىعارمايمىز، ونداي بولادى. ۇلتتىق پالاتا ءبىر جاعىنان، ۇكىمەت ەكىنشى جاعىنان وسى باعىتتا جۇمىس ىستەپ جاتىرمىز. ونداي قاتەردى جويۋىمىز كەرەك. بۇل تۇرعىدا ەلشىلىكتەرمەن دە بەلسەندى جۇمىس ىستەپ جاتىرمىز» ، - دەدى ۇلتتىق پالاتا باسشىسى.
اۆتور
ەسىمجان ناقتىباي
