اتا-بابالارىمىزدىڭ اسقاق رۋحى، مەملەكەتتىلىكتىڭ سۇسى مەن سەسى ەلتاڭبادا كورىنىس تاپسا يگى - ءماجىلىس دەپۋتاتى
استانا. KAZINFORM - ۇلتتىق قۇرىلتاي -ىرگەلى ەلدىك ماسەلەلەر ورتاعا سالىناتىن، يدەولوگيالىق باعدارىمىز تالقىلاناتىن القالى الاڭ.
وسىعان وراي كۇنى كەشە اتىراۋدا وتكەن ۇلتتىق قۇرىلتايدا ۇلت ومىرىنە قاتىستى كوپتەگەن ماڭىزدى ماسەلەمەن قاتار، ەلدىگىمىزدىڭ ايشىقتى بەلگىسى - گەرب ماسەلەسىنىڭدە كوتەرىلۋى ورىندى.
بۇل پىكىردى ق ر پارلامەنتى ءماجىلىسىنىڭ دەپۋتاتى ابزال قۇسپان ءبىلدىردى.
ەل پرەزيدەنتى قاسىم-جومارت توقايەۆ بۇل جايىندا: «ەلتاڭبامىزعا قاتىستى سىني پىكىرلەر ايتىلىپ قالادى. ونى كەڭەس زامانىنداعى گەربكە ۇقساتىپ جاتادى. تىم ەكلەكتيكالىق، كۇردەلى دەيدى. مۇنداي ويدى ەل ىسىنە بەي-جاي قارامايتىن بەلسەندى ازاماتتار عانا ەمەس، ماماندار دا ايتىپ ءجۇر. ورىندى پايىمدار ەسكەرۋسىز قالماۋى كەرەك. ورتاق كەلىسىمگە كەلگەن جاعدايدا ارناۋلى كوميسسيا قۇرۋعا بولادى. بۇل كوميسسيا ماسەلەنى جان- جاقتى قاراستىرىپ، قوعامدىق تالقىلاۋ وتكىزەدى. سوسىن قازاقستاننىڭ جاڭا ەلتاڭباسىنىڭ جوباسىن جاساۋعا اشىق بايقاۋ جاريالانادى» دەپ، مۇنى كوپشىلىكپەن بىرگە كەڭىنەن تالقىلاي وتىرىپ، ورتاق شەشىمگە كەلۋدى ۇسىندى.
بۇل ۇسىنىس قوعامنىڭ قىزىعۋشىلىعىن تۋعىزىپ، قىزۋ تالقىلانۋدا. ولاردىڭ ءبىر توبى قولدانىستاعى گەربتى وسى قالپىندا قالدىرايىق دەسە، ەندى ءبىرى زامان تالابىنا ساي وزگەرتەيىك دەيدى. بۇل -زاڭدى ءارى وڭ قۇبىلىس. ازاماتتىق قوعامنىڭ بەلسەندىلىگى مەن جەتىلگەنىنىڭ كورىنىسى.
ەكىنشى جاعىنان، جۇرتشىلىقتىڭ ەلدىك نىشاندارعا بەي -جاي قارامايتىنىن، وتانشىلدىق سەزىمىنىڭ جوعارىلىعىن ايقىن اڭعارتادى.
الەمدىك تاجىريبەگە سۇيەنسەك، مەملەكەت گەربى سول ەلدىڭ تەرەڭ تاريحىمەن، ءتول دۇنيەتانىمىمەن جانە العا قويعان مۇراتىمەن تىعىز بايلانىستى بولادى. گەرب اتاۋىنىڭ ءوزى «مۇرا» دەگەن ۇعىمدى بىلدىرەدى.
كەيبىر ەلدەر گەربسىز، ەمبلەمامەن عانا شەكتەلگەن.
بۇل رەتتە، ءبىزدىڭ حالقىمىزدىڭ تاريحى دا ەلدىك نىشاندار بەدەرلەۋ تاجىريبەسىنە باي. تامىرىن ساق، عۇن، تۇرىك قاعاناتى زامانىنان تارتاتىن تاڭبالارىمىز - جالپى گەربتىڭ تۇپاتاسىدەۋگە تولىق نەگىز بار. بابالارىمىز قۇرعان كوشپەلى وركەنيەت ءونىمى - تاڭبا جاساۋ ءداستۇرى عۇندار ارقىلى ەۋروپا ەلدەرىنە تارالعان دەۋگە بولادى. سوندىقتان تاريحى تەرەڭ تاڭبا جاساۋ تاجىريبەمىزدى ەل گەربىن جەتىلدىرۋ ىسىنە پايدالانۋدىڭ ماڭىزى زور.
راس، قولدانىستاعى گەربىمىز دە جاقسى جاسالعان. ۇلتىمىزعا ءتان قاستەرلى بەلگىلەرمەن بىرلىك پەن بەيبىتشىلىكتى ايشىقتاۋدى ماقسات تۇتقان. ول وسى كەزەڭنىڭ ەرەكشەلىگى مەن سۇرانىسىنا ساي ەل حالقىن بىرىكتىرۋشىلىك قىزمەتىن مۇلتىكسىز اتقارىپ كەلەدى.
بۇل رەتتە، قازاق مەملەكەتى 1991-جىلى عانا پايدا بولماعانىن، ونىڭ مەملەكەتتىلىك تاريحىنىڭ تەرەڭدە جاتقانىن دا ەسكەرگەنىمىز ءجون. ول - ارعىداعى ساق، عۇن، تۇرىك قاعاناتى، ۇلىق ۇلىس - جوشى ۇلىسىنىڭ، بەرگىدەگى قازاق حاندىعىنىڭ تىكەلەي مۇراگەرى. بۇل - ەرلىك پەن ورلىككە تولى تاريح.
بيىل قازاق دالاسىندا تۋ كوتەرگەن جوشى ۇلىسى - التىن وردانىڭ قۇرىلعانىنا 800 جىل تولۋىن اتاپ وتكەلى وتىرمىز.
«مىنە، قازاق ەلىنىڭ وسىنداي تەرەڭ تاريحي ساباقتاستىعى، جاۋىنگەر اتا- بابالارىمىزدىڭ اسقاق رۋحى، مەملەكەتتىلىكتىڭ سۇسى مەن سەسى، اتاعى مەن ايبىنى گەربتە كورىنىس تاپسا يگى. سوندىقتان الداعى ۋاقىتتا وسى باعىتتا كوپ بولىپ كەڭەسۋ ارتىقتىق ەتپەيدى. وسى ورايدا، پرەزيدەنتتىڭ گەربتى قوعاممەن تالقىلاۋ تۋرالى باستاماسىن قولداي وتىرىپ، ونى تاريحي ساباقتاستىقتى، زامان سۇرانىسىن ەسكەرىپ، جەتىلدىرۋ جايىن ويلاستىرعان ءجون دەپ سانايمىز. بۇل ماڭىزدى ءىستى وسىعان جاۋاپتى مەملەكەتتىك ورگانداردىڭ قولعا الىپ، كوپشىلىكپەن، ءتيىستى ماماندارمەن، قولدانىستاعى گەرب اۆتورىمەن جان-جاقتى تالقىلاۋ ۇيىمداستىرۋىن ۇسىنامىن»، - دەيدى دەپۋتات.
