اتا-انا بالا تاربيەسىنە كوپ كوڭىل ءبولۋى ءۇشىن جۇمىس بەرۋشىلەرگە تالاپ قويىلادى

جيىن بارىسىندا ق ر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتوراعاسىنىڭ ورىنباسارى ءلاززات سۇلەيمەن مادەنيەت جانە اقپارات ءمينيسترى، اتالعان كوميسسيانىڭ ءتوراعاسى ايدا بالايەۆانىڭ فورۋم قاتىسۋشىلارىنا ارنالعان قۇتتىقتاۋ حاتىن وقىپ بەردى.

- بۇگىنگى جيىنعا قوعامداعى وزەكتى ماسەلەلەرگە بەي-جاي قارامايتىن ەڭ بەلسەندى ازاماتتار جينالىپ وتىر. ەلىمىزدە بۇگىندە 18 جاسقا دەيىن - 6 ميلليون 800 مىڭنان استام بالا بار. سوندىقتان اتا-انالار قاۋىمداستىعى - ەلىمىزدە ۇلكەن كۇشكە يە اۋديتوريا. ال وسى ۇلكەن قاۋىمداستىقتىڭ ماسەلەسىن كوتەرىپ، كوكەيتەستى سۇراقتارىن جەتكىزۋدەگى سىزدەردىڭ ۇلەستەرىڭىز وراسان زور. وسى كونفەرەنسياعا ەلىمىزدىڭ ءاربىر وڭىرىنەن ارنايى كەلىپ وتىرعان بارلىعىڭىز دا - قوعامداعى ماسەلەگە نەمقۇرايلى قارامايتىن، ەڭ بەلسەندى ازاماتسىزدار! ۇرپاق تاربيەسى بارشامىز ءۇشىن ماڭىزدى. بۇل باعىتتاعى ماقساتىمىز دا، مۇددەمىز دە ءبىر. وتباسى ۇعىمى - ءبىزدىڭ حالقىمىز ءۇشىن ەجەلدەن قاستەرلى تۇسىنىك. بۇل قۇندىلىقتىڭ ماڭىزى قازىر دە ازايعان جوق. مىقتى مەملەكەت بولۋ ءۇشىن - قوعامدا قۋاتتى وتباسى كوپ بولۋى كەرەك، - دەدى ا. بالايەۆا.

سونىمەن قاتار، مينيستر سوزىندە وتباسى قۇندىلىعى، بالالار مەن جاستار تاربيەسى تاقىرىبى مەملەكەت باسشىسىنىڭ ۇنەمى نازارىندا ەكەنىن اتاپ ءوتتى.

- پرەزيدەنتىمىز ءوز سوزدەرىندە مەملەكەت پەن اتا-انالاردىڭ بالالاردى وقىتۋ مەن تاربيەلەۋدەگى ورتاق جاۋاپكەرشىلىگىن، سانالى اتا-انا بولۋدىڭ ماڭىزدىلىعىن اتاپ وتكەن بولاتىن. بۇل ورايدا، ۇلگىلى وتباسى، ۇرپاق تاربيەسى ماسەلەسىندە بىزگە سىرتتان تاجىريبە ىزدەۋدىڭ قاجەتى جوق. بارىمىزدى باعالاپ، قاجەت دۇنيەنى الىپ، ونى تاربيە ىسىنە دۇرىس قولدانا ءبىلۋ - باستى مىندەت. ارينە بۇگىنگى جاھاندانۋ جاعدايىندا وتكەننىڭ ساباعىن دا، جاڭا زاماننىڭ تالابىن دا ۇمىتپاي بىرگە ۇيرەتۋ ماڭىزدى. پرەزيدەنت جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيانىڭ قولداۋىمەن ساراپشىلار، اتا-انالار قۇندى پىكىرلەر ايتىپ، تاعلىمدى تاجىريبە، وزىق ويلارمەن ءوزارا ءبولىسۋ جۇمىسى وڭىرلەردە دە جۇرگىزىلىپ جاتىر، - دەدى اتالعان كوميسسيانىڭ ءتوراعاسى.

ونىڭ ايتۋىنشا، بالا تاربيەسى سالاسىندا مەملەكەت، قوعام جانە وتباسىنىڭ بىرلەسكەن كۇش-جىگەرى ارقىلى عانا ەڭسەرۋگە بولاتىن كۇردەلى مىندەتتەر تۇر.

- مامانداردىڭ پايىمىنشا، بالالاردىڭ مىنەز-قۇلقىندا اۋىتقۋ بولۋىنىڭ ءبىر سەبەبى اتا-انانىڭ كوڭىل بولمەۋىنەن ورىن الادى. بۇل رەتتە اتا-انالار جۇمىسىنان قولى بوساماي جۇرەدى نەمەسە بالالارمەن دۇرىس ءتىل تابىسا المايدى. «قازاقستاندىق وتباسىلار - 2024» ۇلتتىق بايانداماسىنا سايكەس، رەسپوندەنتتەردىڭ 59,2 پايىزى جۇمىسباستىلىق پەن قاربالاس جۇمىس كەستەسىنە بايلانىستى بالا تاربيەلەۋگە ۋاقىت تاپشىلىعى ماسەلەسىن وزەكتى دەپ ساناعان. جۇمىس بەرۋشىلەر ەڭبەك زاڭناماسىن بۇزىپ، ارتىق جۇمىس ىستەتۋگە جول بەرەدى. بۇل جاعداي اتا-اناعا بالا تاربيەسىندەگى ءوز مىندەتتەرىن ءتيىستى دەڭگەيدە ورىنداۋعا مۇمكىندىك بەرمەيدى، - دەدى مينيستر.

ونىڭ سوزىنە قاراعاندا، اتا- انالاردىڭ تاربيەلىك مۇمكىندىكتەرىن كەڭەيتۋ اياسىندا، ولارعا ءتيىستى جاعداي جاساۋ باعىتىندا جۇمىس بەرۋشىلەردىڭ ەڭبەك زاڭناماسىن بۇزعانى ءۇشىن جاۋاپكەرشىلىگىن كۇشەيتۋ قاجەت. بۇل تۇرعىدا ءوز قىزمەتكەرلەرىنە كورپوراتيۆتىك قامقورلىق كورسەتەتىن جۇمىس بەرۋشىلەردى ىنتالاندىرۋ كەرەك.

- 2025 -جىلى مادەنيەت جانە اقپارات مينيسترلىگى بىرىككەن ۇلتتار ۇيىمىنىڭ قورىمەن (يۋنفپا) بىرلەسىپ، بۇل سالادا ءتيىستى جوبانى جۇزەگە اسىرۋدى جوسپارلاپ وتىر. وسى ورايدا كومپانيالاردا وتباسى مەن اتا- انا بولۋدى قولدايتىن ورتا قۇرۋ ەسكەرىلگەن، - دەدى ايدا بالايەۆا.

ەسكە سالساق، بۇعان دەيىن جوعارعى سوت بالاسىن وقۋعا جىبەرمەگەن اتا-اناعا قاتىستى ءىستى قارادى.

رۋسلان عابباسوۆ

اۆتور

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى