اسىراپ العان بالالارىن قۇلدىقتا ۇستاعان ايەل ەكى جىلعا باس بوستاندىعىنان ايىرىلۋى مۇمكىن
استانا. KAZINFORM - ىشكى ىستەر ءمينيسترىنىڭ ورىنباسارى يگور لەپەحا ۇلىتاۋ وبلىسىندا بالالاردى قامقورلىعىنا الا تۇرىپ، بىرنەشە جىل بويى قۇلدىقتا ۇستاعان ايەلدىڭ ىسىنە قاتىستى تۇسىنىك بەردى.
«بۇل ايەلگە قاتىستى ەكى باپ بويىنشا ءىس قوزعادىق. ءبىرىنشىسى - قامقورشى قۇقىعىن اسىرا پايدالانۋ، ەكىنشىسى - قورلىق جاساۋ. قىلمىستىق ءىستىڭ اياسىندا قارايمىز. وندا زاڭ بويىنشا ەكى جىلعا دەيىن باس بوستاندىعىنان ايىرۋ جازاسى ەسكەرىلگەن»، - دەدى ي. لەپەحا پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.
بۇدان بۇرىن حابارلانعانداي، جاقىندا ۇلىتاۋ وبلىسىندا بالالاردى قامقورلىعىنا الا تۇرىپ، بىرنەشە جىل بويى قۇلدىقتا ۇستاعان ايەل قاماۋعا الىندى.
ەسكە سالا كەتەيىك، بۇعان دەيىن بالا قۇقىقتارى جونىندەگى ۋاكىل دينارا زاكيەۆا ۇلىتاۋ وبلىسىندا 5 جىل بويى فەرمادا جۇمىسقا جەگىلىپ، قۇلدىقتا بولعان بالالارعا بارعانى تۋرالى حابارلاعان بولاتىنبىز.
