اۋسترالياداعى زەرتحانادان ولىمگە اكەلەتىن ۆيرۋستاردىڭ جۇزدەگەن ۇلگىسى جوعالىپ كەتتى
استانا. KAZINFORM - اۋستراليانىڭ كۆينسلەند شتاتىنداعى زەرتحانادان ولىمگە اكەلەتىن ۆيرۋستارى بار 300 دەن استام شىنى تۇتىك جوعالىپ كەتتى، دەپ حابارلايدى Kazinform اگەنتتىگى Daily Mail-عا سىلتەمە جاساپ.
حابارلانعانداي، قۇرامىندا ۆيرۋسى بار 323 تۇتىك جەتىسپەيدى. ولاردىڭ ىشىندە حەندرا ۆيرۋسى بار 100 گە جۋىق تۇتىك، حانتاۆيرۋس بار ەكەۋى جانە ليسساۆيرۋس بار 223 تۇتىك عايىپ بولعان.
ۇلگىلەر 2021 -جىلى جوعالىپ كەتتى، ءبىراق قۇقىق بۇزۋشىلىق تەك 2023 -جىلدىڭ تامىزىندا راستالدى. زەرتحاناداعى سىنامالار ولار ساقتالعان مۇزداتقىش بۇزىلعان كەزدە جوعالعان دەپ بولجانىپ وتىر.
- بۇل ماتەريالداردىڭ ءدال وسى كەزەڭدە جوعالۋى الاڭداۋشىلىق تۋدىرىپ وتىر. ولار جۇمىس ىستەپ تۇرعان مۇزداتقىشقا راسىمدەلمەگەن قۇجات ارقىلى اۋىستىرىلعان، - دەپ مالىمدەدى باسپا ءسوز ءماسليحاتىندا كۆيسلەند شتاتىنىڭ باس سانيتارلىق دارىگەرى دجون دجەررارد.
زەرتحانادان جوعالعان ۆيرۋستاردىڭ ءۇش شتامى ادام ءۇشىن ولىمگە اكەلۋى مۇمكىن.
ۇلگىلەردىڭ قازىر قايدا ەكەنى، ونىڭ جويىلىپ- جويىلماۋى بەلگىسىز كۇيدە قالىپ وتىر. دەسە دە، سىنامالار جوعالعاننان كەيىن حالىققا جۇقتىرۋ قاۋپى بار ەشقانداي دەرەك تىركەلگەن جوق.
- قوعامعا قاۋىپ ءتونۋى مۇمكىن سەناريدى ەلەستەتۋ قيىن. ايتا كەتۋ كەرەك، ۆيرۋس ۇلگىلەرى مۇزداتقىشتان تىس جەردە تەز بۇزىلىپ، جۇقپالى قاسيەتتەرىن جوعالتادى. ماڭىزدىسى، سوڭعى بەس جىلدا كۆينسلەند تۇرعىندارى اراسىندا حەندرا ۆيرۋسى نەمەسە ليسساۆيرۋس جۇقتىرۋ جاعدايلارى بولعان جوق جانە اۋستراليادا ەشقاشان حانتاۆيرۋس جۇقتىرۋ جاعدايى تىركەلمەگەن، - دەپ قوستى ول.
سونداي- اق ۆيرۋس ۇلگىلەرى ولاردى زيان تيگىزۋ ماقساتىندا پايدالانۋ ءۇشىن قولدى بولدى دەۋگە نەگىز جوق. ۆيرۋستاردىڭ ءوزى ءقاۋىپتى بولعانىمەن، جۇقتىرۋ دەڭگەيىنىڭ تومەندىگى ولاردى ماڭىزدى گەنەتيكالىق موديفيكاتسياسىز بيولوگيالىق قارۋ جاساۋ ءۇشىن جارامسىز ەتەدى.
