استراحاندا كوپقاباتتى ءۇيدىڭ ءبىر بولىگى وپىرىلىپ قۇلادى
رەسەيدىڭ استراحان قالاسىندا كوپقاباتتى ءۇيدىڭ ءبىر بولىگى وپىرىلىپ قۇلادى. بۇل تۋرالى استراحان وبلىسىنىڭ گۋبەرناتورى يگور بابۋشكين Telegram-داعى جەكە كانالىندا جازدى. قازاقپارات بۇل تۋرالى ت ا س س-قا سىلتەمە جاساپ حابارلايدى.
«استراحاندا ۆوكزال ماڭى الاڭىنداعى ءۇيدىڭ ءبىر بولىگى قۇلادى. شۇعىل قىزمەتتەر وقيعا ورنىندا. مەنىڭ تاپسىرماممەن جەدەل شتاب قۇرىلدى»، - دەپ جازدى ول.
ت ا س س-قا شۇعىل قىزمەتتەردەن ءمالىم ەتكەندەي، بەس قاباتتى ءۇيدىڭ ەكى كىرەبەرىس بولىگى وپىرىلعان.
ي. بابۋشكيننىڭ ايتۋىنشا، تۇرعىندار ءۇشىن استراحانداعى مەكتەپتە ۋاقىتشا ورنالاسۋ پۋنكتى ۇيىمداستىرىلدى. قالانىڭ ەكى اۋرۋحاناسى زارداپ شەككەندەردى قابىلداۋعا دايىن وتىر. وقيعا ورنىندا مەديتسينا ماماندارى جۇمىس ىستەۋدە.
«213 ادام ەۆاكۋاتسيالاندى، ونىڭ ىشىندە 37 بالا بار. زارداپ شەككەندەر بويىنشا مالىمەت ناقتىلانىپ جاتىر»، - دەلىنگەن رەسەي توتەنشە جاعدايلار مينيسترلىگىنىڭ باسپا ءسوز بايانىندا.
سونداي-اق ۆەدومستۆو دەرەگىنە سۇيەنسەك، وقيعا بولاردىڭ الدىندا ءۇيدىڭ قابىرعالارىندا جارىقتار بايقالعانى تۋرالى اقپارات تۇسكەن.
ءۇيدىڭ قۇلاۋىنا گاز جارىلىسى سەبەپ بولدى دەگەن نۇسقا جوققا شىعارىلدى.
ۇيىندىلەردىڭ استىن تەكسەرىپ جاتقان قۇتقارۋشىلار ءبىر مينۋت تىنىشتىق جاريالادى. بۇل قيراندى استىندا قالۋى مۇمكىن ادامداردىڭ داۋىسىن ەستۋ ءۇشىن جاسالدى.
