استانانىڭ ىرگەسىندە جاڭا ءسۇت زاۋىتى اشىلدى

ينۆەستيتسيالىق جوبانى «نۇرلى» وندىرىستىك كووپەراتيۆى جۇزەگە اسىرعان. زاۋىتتىڭ اشىلۋىنا سەلينوگراد اۋدانىنىڭ اكىمى باحىدبەك وسپانبەكوۆ، كاسىپورىن ديرەكتورى قۋانىش نايمان قاتىستى.

- زاۋىت بەس ايدا سالىندى. جوبانىڭ قۇنى - 130 ميلليون تەڭگە. جابدىق ساتىپ الىندى. قازىرگى ۋاقىتتا ىسكە قوسۋ-جوندەۋ جۇمىستارى ءجۇرىپ جاتىر. زاۋىتتا تاۋلىگىنە 3000 تونناعا دەيىن ءسۇت وڭدەۋگە بولادى. ازىرشە تاۋلىگىنە 1200 ليتر ءسۇت وڭدەۋدەن ءوتىپ جاتىر. ون ادامدى تۇراقتى جۇمىسپەن قامتىپ وتىرمىز، - دەدى قۋانىش نايمان.

وسى رەتتە اۋدان باسشىسى وڭىردە كاسىپكەرلىكتى دامىتۋعا قولايلى جاعداي جاسالىپ جاتقانىن اتاپ ءوتتى.

- ءبىز ءارقاشان تاماق جانە قايتا وڭدەۋ ونەركاسىبىن دامىتۋعا مۇددەلىمىز جانە بۇكىل اۋىل شارۋاشىلىعى وندىرۋشىلەرىنە قولداۋ كورسەتۋگە دايىنبىز. بىزدە كاسىپكەرلىك پەن ەكونوميكانى دامىتۋ ماقساتىندا قولايلى جاعداي جاساۋ ءۇشىن بارلىق قاجەتتى رەسۋرستار مەن الەۋەت بار. وزدەرىڭىز بىلەتىندەي، سوڭعى 5 جىل ىشىندە «مويا فەرما» ج ش س ونىمدەرى ءبىزدىڭ بارلىق اۋىل شارۋاشىلىعى جارمەڭكەلەرىندە ساتىلدى. بۇل - ءبىزدىڭ اۋىل ەكونوميكاسى مەن اۋىل شارۋاشىلىعى سەكتورىن دامىتۋعا قوسىپ وتىرعان ۇلەسىمىزدىڭ دالەلى، - دەدى سەلينوگراد اۋدانىنىڭ اكىمى باحىدبەك وسپانبەكوۆ.

«مويا فەرما» كومپانياسى ءسۇت، ايران، ماي، قايماق، يوگۋرت، سۇزبە ءتارىزدى سۇتتەن جاسالعان ەكولوگيالىق تازا جانە ساپالى ونىمدەردى شىعارادى.

بۇگىندە زاۋىت ونىمدەرىن ەلورداداعى «فەرماگ»، «ۆكۋسمارت»، «گاسترونوم»، «Aqmol»، «ecoshop»، «eco№ 1» ، «ynterfood» ، Galmart» دۇكەندەرىنىڭ سورەلەرىنەن، سونداي-اق، اۋىل شارۋاشىلىعى ونىمدەرىنىڭ جارمەڭكەسىنەن كورۋگە بولادى.

الداعى ۋاقىتتا وزگە وڭىرلەردىڭ نارىعىنا شىعۋ جوسپارلانعان.

ايتا كەتسەك، بۇدان بۇرىن استانادا اقمولا وبلىسى اۋىل شارۋاشىلىعى تاۋار وندىرۋشىلەرىنىڭ جارمەڭكەسى وتكەنىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى