استانانىڭ نۇرا اۋدانى تۇرعىندارعا 2,5 توننا پالاۋ دايىندادى
استانا. KAZINFORM - ەلوردانىڭ ورتالىق ساياباعىندا ەكىنشى كۇن قاتارىنان ناۋرىز مەرەكەسى تويلانىپ جاتىر. مەرەكەن ۇيىمداستىرۋشى - نۇرا اۋدانىنىڭ اكىمدىگى.
ورتالىق ساياباقتاعى كوكتەم مەرەكەسى حالىقارالىق دەڭگەيدە اتاپ وتىلۋدە. ناۋرىز مەرەكەسىنە يران مەن تاجىكستان ەلشىلىكتەرى قوسىلدى. ديپلوماتتار ءوز كيىز ۇيلەرىندە ناۋرىز كوجە رەتسەپتەرىمەن ءبولىسىپ، ءداستۇرلى تاتتىلەرىن تاراتۋدا. تۇركى جانە پارسى حالىقتارى ءۇشىن ورتاق مەرەكەگە 2 كۇندە 15 مىڭنان استام استانالىق كەلگەن.
سونىمەن بىرگە، جالپىحالىقتىق مەرەكەدە پالاۋ فەستيۆالى ءوتتى. وندا وزبەكستان، تاجىكستان، ازەربايجان اسپازدارى قۇرامىمەن عانا ەمەس، ءپىسىرۋ ادىسىمەن دە ءبىر- بىرىنەن ەرەكشەلەنەتىن پالاۋدىڭ الۋان ءتۇرىن ءپىسىردى. ەكى كۇندە استانالىقتار 2,5 توننادان استام تاجىك، سامارقان، تاشكەنت پالاۋلارىنان ءدام تاتتى.
مەرەكە قوناقتارى ءۇشىن ەسترادا جۇلدىزدارى مەن بي انسامبلدەرى ونەر كورسەتتى. مەرەكە اللەياسىندا ۇلتتىق كيىمدەگى باتىرلار، تازى يتتەر جانە حالىق اندەرىن شىرقايتىن دومبىراشىلار شەرۋ جاسادى.
«ءبىز بۇگىن جىل باسى - ناۋرىزدى تويلاپ جاتىرمىز. بيىل ءبىز ناۋرىزنامانى جاڭعىرتىپ، مەرەكەنى جاڭا فورماتتا اتاپ وتەمىز. ەلوردانىڭ ورتالىق ساياباعىندا دا ۇزاق ۋاقىت بويى جالپى حالىقتىق ءىس- شارا وتپەگەن ەدى. كەشە مەرەكەگە 7 مىڭنان استام ادام كەلىپ، 1 توننادان استام پالاۋ دايىندالدى. بۇگىن ءبىز ودان دا كوپ حالىقتى كۇتەمىز. ەكى كۇندە مۇندا 20 مىڭعا جۋىق ادام كەلەدى دەپ ويلايمىن. بۇگىندە مۇندا ءار ءتۇرلى ەلدەردىڭ اسپازدارى عانا ەمەس، تاجىكستان، يران ەلشىلىكتەرىنىڭ وكىلدەرى دە بار. ويتكەنى، ناۋرىز - بارلىق تۇركى حالىقتارىنىڭ مەرەكەسى جانە ول بارلىق حالىقتاردى بىرىكتىرەدى. ولار ناۋرىزدى قالاي تويلايتىندارىن كورسەتىپ، مەرەكەنىڭ ەرەكشەلىكتەرى تۋرالى اڭگىمەلەيدى»، - دەدى نۇرا اۋدانى اكىمىنىڭ ورىنباسارى ءاليا ابسەمەتوۆا باق وكىلدەرىنە بەرگەن سۇحباتىندا.
ونىڭ ايتۋىنشا، ادامدار مەرەكەنى وتە جىلى قابىلدادى، وعان جاقسى اۋا رايى دا ىقپال ەتتى.
«اتالعان ءىس- شارانى نۇرا اۋدانى اكىمىنىڭ اپپاراتى ۇيىمداستىردى. بۇدان دا باسقا ءتورت ورىندا، تۇرعىن ءۇي كەشەندەرىنىڭ اۋلالارىندا ناۋرىز مەيرامى تويلاندى. كورشىلەردىڭ وزدەرى باس قوسىپ، كيىز ءۇي قويىپ، كونتسەرت ۇيىمداستىردى. ءبىزدىڭ اكىمدىككە بيىل 1 جىل تولادى جانە بۇل ءبىزدىڭ العاشقى ناۋرىزىمىز»، - دەدى ول.
مەرەكەنى ۇيىمداستىرۋعا كومەكتەسۋ ءۇشىن جانە وعان حالىقارالىق اۋقىم بەرۋ ءۇشىن ءارتۇرلى ەلدەردەن قوناقتار كەلدى. سولاردىڭ ءبىرى - تاجىكستاننان كەلگەن اسپاز دجمولەددين استاناكۋلوۆ.
«ءبىز بۇگىن استانا تۇرعىندارى مەن قوناقتارى ءۇشىن ارنايى 30 كەلى پالاۋ دايىندادىق. بۇل تاجىك پالاۋى، جاي عانا ەمەس، مەرەكەلىك پالاۋ دەپ اتالادى. ونىڭ كۇندەلىكتى پالاۋدان ايىرماشىلىعى بار، ماسەلەن مەرەكەلىك پالاۋعا ارنايى زىعىر مايى قوسىلادى. مۇنداي پالاۋ قازانى كەم دەگەندە 500 ادامدى تاماقتاندىرا الادى»، - دەدى اسپاز.
ايتا كەتەيىك، بيىل ناۋرىز مەيرامى 10 كۇن بويى اتالىپ وتەدى. ناۋرىزنامانىڭ ءار كۇنى بەلگىلى ءبىر تاقىرىپقا ارنالعان.
