استانالىقتار قارجى پيراميداسىن Telegram-بوت ارقىلى انىقتاي الادى
استانا قالاسى ەكونوميكالىق تەرگەۋ دەپارتامەنتىنىڭ 2 تەرگەۋ باسقارماسىنىڭ باسشىسى تيمۋر مۇقانوۆ قارجى پيراميداسىنىڭ قۇربانى بولماۋ جولدارىن ايتىپ بەردى، دەپ حابارلايدى Kazinform.
«قازىرگى ۋاقىتتا استانا قالاسى بويىنشا ەكونوميكالىق تەرگەۋ دەپارتامەنتىندە Qnet، Antares، Best Road Investment سياقتى قارجى پيراميدالارىنا قاتىستى ءبىرقاتار قىلمىستىق ءىس تەرگەلىپ جاتىر. زاڭدى كۇشىنە ەنگەن ۇكىمدەر بار، وندا سوتتالۋشىلار ناقتى مەرزىمگە باس بوستاندىعىنان ايىرىلعان. سونداي-اق، دەپارتامەنت ويىن بيزنەسىنە، ويىن اپپاراتتارىنا، تەرمينالدارعا قارسى ءىس-قيمىل بويىنشا ءبىرقاتار شارالار جۇرگىزۋدە. ويتكەنى ويىن مەكەمەلەرى قازىرگى قوعامنىڭ الەۋمەتتىك پروبلەمالارىنىڭ بىرىنە اينالدى. اسىرەسە ادامدار پسيحولوگيالىق تۇرعىدان ويىنعا تاۋەلدى بولىپ، جەكە جيناقتارىن، مۇلىكتەرىن ساتا باستايدى. قايعىلى سالدار ورىن الىپ جاتىر»، - دەدى تيمۋر مۇقانوۆ استانا قالاسىنىڭ كوممۋنيكاتسيالار قىزمەتىندە وتكەن بريفينگتە.
سپيكەردىڭ ايتۋىنشا، ينتەرنەت- رەسۋرستاردى تەكسەرۋ بويىنشا «بايقا، پيراميدا!» Telegram-بوتى ىسكە قوسىلدى.
ەندى ازاماتتار سايتتار مەن الەۋمەتتىك جەلىلەردى قارجىلىق پيراميدا قاۋپىن ءوز بەتىنشە تەكسەرىپ، باعامداي الادى.
سونىمەن بىرگە، ت. مۇقانوۆ قارجى پيراميداسىن قالاي انىقتاۋ كەرەكتىگىن ايتتى.
«بلوگەرلەرمەن جۇمىس ىستەپ جاتىرمىز. جاقىندا دينارا ساتجانمەن سۇحباتتاستىق، وندا قارجى پيراميدالارىنىڭ بارلىق بەلگىلەرىن سيپاتتاپ بەردىك. ۇيىمنىڭ ىسكەرلىك بەدەلىن باق، الەۋمەتتىك جەلىلەر ارقىلى تەكسەرۋ قاجەت. وسى قارجى پيراميداسىنا ينۆەستيتسيا سالۋدىڭ قاجەتى جوق دەپ جازىلعان تۇسىنىكتەمەلەردى وقىپ شىعۋ كەرەك. تاۋەلسىز شولۋلاردى ىزدەپ وقىپ، جوعارى تابىس تۋرالى ۋادەلەرگە سەنبەۋىڭىز كەرەك. ءاربىر قارجى پيراميداسىنداعى ءبىرىنشى نارسە - ءسىز اي سايىن سالعان قاراجاتتىڭ %40-70 ارالىعىندا جوعارى كىرىس ۋادە ەتۋ. ءبىر دە ءبىر ۇيىم مۇنداي ناقتى ەمەس كىرىستى ۋادە ەتە المايدى»، — دەپ اتاپ ءوتتى تەرگەۋ باسقارماسىنىڭ باسشىسى.
