استانالىقتار كوشەدەن قوقىس كورسە كوتەرە مە - ەكسپەريمەنت

بۇل شارا ەلوردا تۇرعىندارىنىڭ ەكولوگيالىق مادەنيەتتى قالاي ساقتايتىنىن جانە قورشاعان ورتانىڭ تازالىعىنا قامقورلىعىن انىقتاۋعا كومەكتەستى.

ۇيىمداستىرۋشىلار ەسىل وزەنىنىڭ جاعاسىنداعى جاياۋ جۇرگىنشىلەر كوشەسىنە بوس بوتەلكە، قاعازدار جانە باسقا دا قوقىستاردى تاستادى.

ءتۇسىرىلىم توبى ارى-بەرى وتكەن ادامدار جەردە جاتقان قوقىستى كوتەرە مە، ونى ارنايى قوقىس جاشىگىنە سالا ما - سونى باقىلاپ وتىردى.

الەۋمەتتىك ەكسپەريمەنت بارىسى جاسىرىن كامەراعا ءتۇسىرىلدى.

ۆيدەودان ەلوردا تۇرعىندارى قورشاعان ورتانىڭ تازالىعىنا بەي-جاي قاراماي، جەردە جاتقان قوقىستى ارنايى جاشىككە تاستايتىنىن بايقاۋعا بولادى.

«ءبىز استانا تۇرعىندارىنىڭ تازالىقتى ساقتاعانىن كوردىك. بۇعان ءبىر ساعاتتاي قاراپ كوز جەتكىزدىك. ەرەسەكتەر دە، بالالار دا جەردە جاتقان قوقىستى ارنايى قوقىس جاشىگىنە تاستايتىنىن كورىپ قۋاندىق. ءبارىمىز اينالامىزداعى تازالىققا جاۋاپتىمىز. كوممۋنالدىق سالانىڭ قىزمەتكەرلەرى عانا ەمەس، ءاربىر تۇرعىن ءبىزدىڭ قالامىزدىڭ تازا ءارى جايلى بولۋىنا ءوز ۇلەسىن قوسۋى ءتيىس دەپ سانايمىز»، - دەپ اتاپ ءوتتى ۇيىمداستىرۋشىلار.

استانادا «تازا قازاقستان: استانا - تازالىق پەن ءتارتىپتىڭ ۇلگىسى» اۋقىمدى ەكولوگيالىق اكسياسى ءوتىپ جاتىر.

بۇل اپتا «ءمولدىر بۇلاق» دەپ اتالادى، ونىڭ بارىسىندا سۋ ايدىندارى - وزەندەر مەن كولدەردىڭ اينالاسى قوقىستان تازارتىلادى.

اۋقىمدى ەكواكسيا اياسىندا قالانى سانيتارلىق تازارتۋ، نوسەر جانە ارىق كارىز جەلىلەرى، كوشەلەردى، تروتۋارلاردى، كۆارتالىشىلىك اۋماقتاردى، قوعامدىق كەڭىستىكتەر مەن اۋلالاردى تازالاۋ جۇمىسى جۇرگىزىلىپ جاتىر.

سونداي-اق، جاسىل جەلەكتى كۇتىپ- باپتاۋ جانە وتىرعىزۋ، ساۋدا نىساندارىنا ىرگەلەس اۋماقتاردى جيناۋ، كوگالدار مەن گۇلزارلاردى ورناتۋ، رۇقسات ەتىلمەگەن پوليگونداردى جويۋ ءىسى جولعا قويىلعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى