استانادان بۋرابايعا 2,5 ساعاتتا جەتكىزەتىن پويىز ىسكە قوسىلدى
استانا. KAZINFORM - تاۋەلسىزدىك كۇنى قارساڭىندا «استانا-بۋراباي كۋرورتى» جاڭا تۋريستىك ەلەكتر پويىزى ىسكە قوسىلدى. بۇل باعىتتىڭ ەرەكشەلىگى - كۋرورتتىق ايماققا ەش ايالداماسىز 2 ساعات 26 مينۋتتا جەتۋگە بولادى.
7515/7516-«استانا-بۋراباي كۋرورتى» تۋريستىك باعىتى تاقىرىپقا ساي بەزەندىرىلگەن. وندا 6 ۆاگون بار جانە 574 جولاۋشى سىيادى.
بيلەت قۇنى 2500-2700 تەڭگە ارالىعىندا.
پويىز ۆاگوندارى قازاقستاندا جاسالعان (زيكستو) جانە «كومفورت پليۋس» كلاستى ورىندىقتارمەن جابدىقتالعان.
- مەملەكەت باسشىسىنىڭ ەلدىڭ تۋريستىك الەۋەتىن دامىتۋ تاپسىرماسىن ورىنداۋ ماقساتىندا كولىك مينيسترلىگى ينفراقۇرىلىمدى جاڭعىرتۋ جانە تەمىرجول تاسىمالدارى ءۇشىن قولايلى جاعداي جاساپ كەلەدى. ەلەكتر پويىزدا ميكروكليمات جۇيەسى، جىلدام قۋاتتايتىن USB- روزەتكالار، Wi-Fi جانە ۆەلوسيپەد بەكىتۋگە ارنالعان قۇرالدار بار. مۇمكىندىگى شەكتەۋلى جولاۋشىلار ءۇشىن ارنايى كوتەرگىشتەر مەن مۇگەدەكتەر اربالارىنا ارنالعان ورىندار قاراستىرىلعان، - دەدى ق ر كولىك مينيسترلىگى تەمىرجول جانە سۋ كولىگى كوميتەتىنىڭ ءتوراعاسى جانىبەك تايجانوۆ تىلشىلەرگە بەرگەن سۇحباتىندا.
سونىمەن قاتار جول بويىندا استانا مەن بۋرابايدىڭ تابيعاتى مەن تاريحى تۋرالى ەكسكليۋزيۆتى اۋديوگيدتى تىڭداۋعا بولادى.
العاشقى كۇنى-اق تۋريستىك پويىز بيلەتتەرىن 100 دەن استام جولاۋشى ساتىپ العان. كەلۋشىلەرگە مەرەكەلىك فۋرشەت، ۆيكتورينالىق سۇراقتار ۇيىمداستىرىلىپ، ەستەلىك سىيلىقتار تاراتىلدى.
ايتا كەتەيىك، قازىرگى ۋاقىتتا استانادان بۋراباي كۋرورتىنا دەيىن ءارتۇرلى كەستەمەن 5 پويىز قاتىنايدى.
