استاناداعى مەكتەپ-ليتسەيگە تالعات بيگەلدينوۆتىڭ ەسىمى بەرىلدى
ەلوردانىڭ ونوماستيكا كوميسسياسى №1-مەكتەپ-ليتسەيگە ەكى مارتە كەڭەس وداعىنىڭ باتىرى، اۆياتسيا گەنەرال-مايورى تالعات بيگەلدينوۆتىڭ ەسىمىن بەرۋ شەشىمى قابىلداندى، دەپ حابارلايدى قازاقپارات.
قورعانىس مينيسترلىگىنەن ءمالىم ەتكەندەي، مەكتەپ-ليتسەيدە سونداي-اق، تالعات بيگەلدينوۆ اتىنداعى كابينەت اشىلدى. بۇل جەرگە ۇشاقتاردىڭ ۇلگىلەرى، فوتوسۋرەتتەر جانە ۇشقىشتىڭ ماراپاتتارىنىڭ كوشىرمەلەرى قويىلدى.
سالتاناتتى راسىمگە كەلگەن قورعانىس ءمينيسترىنىڭ ورىنباسارى گەنەرال-لەيتەنانت سۇلتان كامالەتدينوۆ پەن ۇشقىش-عارىشكەر، كەڭەس وداعىنىڭ باتىرى، حالىق قاھارمانى، اۆياتسيا گەنەرال- مايورى توقتار اۋباكىروۆ مەكتەپتىڭ كىرە بەرىسىندە لەنتا قيدى.
«تالعات بيگەلدينوۆتىڭ بۇكىل عۇمىرى ەرلىككە تولى بولدى. ونىڭ جارقىن ەسىمى حالىق جادىندا ماڭگى ساقتالىپ، تاۋەلسىز قازاقستان تاريحىنا التىن ارىپتەرمەن جازىلارى ءسوزسىز. ول ناعىز اڭىز ادام ەدى»، - دەدى ءمينيستردىڭ ورىنباسارى.
كوك اسپاندى باعىندىرعان ايگىلى ۇشقىش اۋە شايقاستارىندا جاۋدىڭ ۇشاقتارىن جايراتقانى ءۇشىن 24 جاسىندا كەڭەس وداعىنىڭ باتىرى اتاندى. باتىر جاۋىنگەرلىك ميسسيامەن 305 مارتە ۇشىپ، قارسىلاستىڭ ۇشاقتارىن بىرنەشە مارتە اتىپ تۇسىرگەن. سوعىستان كەيىن تالعات بيگەلدينوۆ ك س ر و اسكەري-اۋە كۇشتەرى مەن ازاماتتىق اۆياتسيادا قىزمەتىن جالعاستىردى.
