استانادا ورتالىق ازياداعى الەۋمەتتىك كاسىپكەرلەردىڭ العاشقى قۇرىلتايى وتەدى
24-قاراشادا استانادا ورتالىق ازياداعى الەۋمەتتىك كاسىپكەرلەردىڭ ءبىرىنشى قۇرىلتايى وتەدى، دەپ حابارلايدى Kazinform ەلوردا اكىمدىگىنىڭ رەسمي سايتىنا سىلتەمە جاساپ.
العاش رەت قازاقستان، قىرعىزستان، تاجىكستان، وزبەكستان جانە تۇرىكمەنستان ەلدەرىنەن كەلگەن الەۋمەتتىك كاسىپ سالاسىنىڭ كوشباسشىلارى وسىنداي ءىس- شارادا باس قوسادى. قۇرىلتايعا 300 دەن استام الەۋمەتتىك كاسىپكەر، سونداي- اق مەملەكەتتىك ورگانداردىڭ، قوعامدىق ۇيىمداردىڭ وكىلدەرى، ازاماتتىق بەلسەندىلەر قاتىسادى دەپ جوسپارلانعان.
فورۋم اياسىندا ساراپشىلار ورتالىق ازياداعى تابىستى الەۋمەتتىك كاسىپكەرلىك جوبالارداعى تاجىريبەسىمەن بولىسەدى، الەۋمەتتىك كاسىپكەرلىك ارقىلى سالاداعى ماسەلەلەردى شەشۋدە يننوۆاتسيالىق تاسىلدەر، الەۋمەتتىك كاسىپكەرلەردى قولداۋداعى مەملەكەتتىڭ ءرولى، الەۋمەتتىك باستامالاردى قارجىلاندىرۋ تەتىكتەرى تۋرالى تالقىلايدى.
ماڭىزدى تاقىرىپتارىنىڭ ءبىرى ورتالىق ازيا ەلدەرىنىڭ الەۋمەتتىك كاسىپكەرلەرى، مەملەكەتتىك ورگاندارى مەن بيزنەس- قوعامداستىعى اراسىنداعى ارىپتەستىك قاتىناستاردى نىعايتۋ ماسەلەلەرىنە ارنالادى.
قۇرىلتاي قازاقستاندىق الەۋمەتتىك يننوۆاتورلار قاۋىمداستىعىنىڭ (ا س ي) باستاماسىمەن جانە قازاقستان ۇلتتىق ەكونوميكا مينيسترلىگىنىڭ، ورتالىق ازيا ەلدەرى دەپۋتاتتارىنىڭ، استانا اكىمدىگىنىڭ، سونداي- اق Eurasian Resources Group (ERG) قولداۋىمەن وتەدى.
