استانادا وقۋشىلاردى كىتاپ وقۋعا باۋليتىن جاڭا جوبا قولعا الىندى

ادەتتە، ساباق باستالار كەزدە نەمەسە ۇزىلىستە سوعىلاتىن قوڭىراۋدان بولەك، كىتاپ وقۋدى باستاۋ كەرەگىن بىلدىرەتىن جەكە قوڭىراۋ سوعىلادى. اۋەن ءۇنى ەستىلىسىمەن بالالار كىتاپتارىن شىعارىپ، وقۋعا قامدانادى.

«وسى جوبا «ءبىرتۇتاس تاربيە» باعدارلاماسىنا ءدوپ كەلەدى. 8 مينۋتتىق وقۋ جوباسىنىڭ ماقساتى وقۋشىلاردى كوركەم شىعارما وقۋعا ىنتالاندىرۋ، قالىپتاستىرۋ جانە دە تانىم كوكجيەگىن كەڭەيتۋ"، - دەيدى قازاق ءتىلى مەن ادەبيەتى ءپانىنىڭ مۇعالىمى اينۇر نۇرجانوۆا.

جاڭا جوبانىڭ وقۋشىلار اراسىندا كىتاپ وقۋدى ناسيحاتتاۋدا ماڭىزى زور. تىڭ باستاما «وقۋعا قۇشتار مەكتەپ» جوباسى اياسىندا قولعا الىنعان.

وقۋ جىلىنىڭ سوڭىنا دەيىن ءار وقۋشى كەمى 10 كىتاپتى وقىپ شىعادى. سوسىن ءار كىتاپتى وقىپ بىتەرگەن سوڭ ونى سىنىپ بولىپ تالقىلايدى. 8 مينۋتتىق وقۋ جوباسى اياسىندا وقۋشىلارعا ۇسىنىلاتىن كىتاپتاردىڭ مازمۇندىق قۇرىلىمى ۇلتتىق سانانى قالىپتاستىرۋعا، ادامگەرشىلىك قاسيەتتەردى دارىپتەۋگە، سونىمەن قاتار، سالاۋاتتى ءومىر سالتىن ناسيحاتتاۋعا باعىتتالعان. ياعني، وسى ارقىلى وقۋشىلاردىڭ كىتاپ وقۋعا دەگەن قىزىعۋشىلىعى ارتادى. قوعامعا دەگەن كوزقاراسى وزگەرەدى جانە سويلەۋ مادەنيەتى قالىپتاسادى.

جوبا اياسىندا مازمۇنى جاعىنان الدىن الا ىرىكتەلگەن ادەبيەتتەر تىزىمىنەن كەز كەلگەن كىتاپتى وقۋعا بولادى. تۋىندى كادىمگى كىتاپ بولۋى شارت. جوبانى اتا- انالار قاۋىمى دا قۋانا قولداعان.

ماسەلەن، جۇماگۇل ابسەمەتوۆا: "مەن مۇنى دۇرىس جوبا دەپ ەسەپتەيمىن. وتە ورىندى. بالالارىما ايتىپ وتىرۋعا تىرىسامىن جانە نەمەرەلەرىمە دە كىتاپ وقۋدى دارىپتەپ وتىرامىن"، - دەدى.

حالىقارالىق «قازاق ءتىلى» قوعامى» ق ب پرەزيدەنتى راۋان كەنجەحان ۇلى: "وكىنىشتىسى، ءدال قازىر بىزدە سول وقۋ جاعى جانە وقىعاندى ءتۇسىنىپ، سونى اۋىزشا، جازباشا جەتكىزۋ جاعى ايتارلىقتاي تومەن. ونى دالەلدەپ وتىرعان ءبىزدىڭ عانا زەرتتەۋلەر مەن پىكىرلەر ەمەس. وقۋ ساۋاتتىلىعىنا قارايتىن بولساق، بىزدە قازاقستانداعى وقۋشىلاردىڭ 64 پايىزى ورتاشادان تومەن ناتيجە كورسەتىپ جاتىر. سوندىقتان بىزگە قوعام بولىپ، ەل بولىپ وسى وقۋ ساۋاتتىلىعىنا كۇش سالۋ كەرەك دەپ ەسەپتەيدى"، - دەدى.

جاڭا جوبانىڭ بەرەر ءتالىم مەن تاربيەسى وتە زور. ونى ۇستازدار مەن اتا- انالار ايتىپ وتىر.

اۆتور

ەربول جانات

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى