استانادا تۇرعىنداردى پاتەرگە تىركەۋگە قويۋدىڭ جاڭا ءتارتىبى قاشان قابىلدانادى
استانا. KAZINFORM - استانا قالاسى ءماسليحاتىنىڭ ءتوراعاسى تابيعات زەينۇلقابدەن تۇراقتى جانە ۋاقىتشا تۇرعىلىقتى جەرى بويىنشا تىركەۋ ءنورماتيۆىن بەلگىلەۋ ماسەلەسىنە قاتىستى پىكىر ءبىلدىردى.
- قازىر بۇل ماسەلەنى دەپۋتاتتىق كورپۋستا دا (پارلامەنتتە)، باسقا دا مەملەكەتتىك ورگانداردا تالقىلانىپ جاتىر. وزدەرىڭىز بىلەسىزدەر، استانادا رەسمي تۇردە 1 ميلليون 550 مىڭعا جۋىق ادام تۇرسا، ءىس جۇزىندە 1 ميلليون 800 مىڭ - 1 ميلليون 900 مىڭعا جۋىقتايدى. ادامداردىڭ ءبىرازى ءالى تىركەلمەگەن. جاقىن ارادا بۇل ماسەلەگە قاتىستى ءتيىستى رەتتەۋ تەتىگى ەنگىزىلەدى دەپ ويلايمىن. شامامەن، ءبىرىنشى جارتىجىلدىقتا شەشىم بولادى، - دەدى ت. زەينۇلقابدەن پارلامەنت ءماجىلىسىنىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ەسكە سالساق، جاقىندا ماجىلىستە زاڭناماعا استانانى جانە رەسپۋبليكالىق ماڭىزى بار قالالاردى دامىتۋ باعىتىنداعى وزگەرىستەر ەنگىزۋگە ارنالعان زاڭ جوباسى ءبىرىنشى وقىلىمدا تالقىلاندى.
وندا استانادا ءبىر پاتەرگە تىركەلەتىن تۇرعىننىڭ سانى باسپانانىڭ شارشى مەترىنە قاراي بەلگىلەنەتىنى ايتىلعان.
ايتا كەتەلىك اقشاعا ۇيىنە تىركەۋگە قوياتىندار جاۋاپكەرشىلىككە تارتىلاتىنى تۋرالى جازعان ەدىك.
