استانادا «ۇستاز» فيلمىنىڭ تانىستىرىلىمى ءوتتى
استانا. KAZINFORM - وقۋ-اعارتۋ مينيسترلىگىنىڭ قولداۋىمەن استانادا «ۇستاز» فيلمىنىڭ تانىستىرىلىمى ءوتتى، دەپ حابارلادى مينيسترلىكتىڭ باسپا ءسوز قىزمەتى.
قازاقستان رەسپۋبليكاسى وقۋ-اعارتۋ، مادەنيەت جانە اقپارات مينيسترلىكتەرىنىڭ جانە جەتىسۋ وبلىستىق اكىمدىگىنىڭ قولداۋىمەن بۇگىن استانالىق پەداگوگتەر مەن ءبىلىم بەرۋ ءىسىنىڭ ارداگەرلەرى ءۇشىن جەتىسۋلىق رەجيسسەر ەرلان وشاقبايەۆتىڭ «ۇستاز» فيلمىنىڭ تۇساۋكەسەرى ۇيىمداستىرىلدى.
فيلمدە جاس ۇستازدىڭ تۋعان اۋىلىنا ورالۋى، ءوزى وقىعان مەكتەپتە جۇمىس ىستەۋى، وقۋشىلارمەن قارىم-قاتىناسى، مۇعالىمنىڭ بەدەلى، شاكىرتتەرىن ءبىلىم باسەكەسىنە قابىلەتتى ەتۋگە دەگەن ۇمتىلىسى مەن جاڭاشىلدىعى، سونداي-اق پەداگوگيكالىق قىزمەتتىڭ قيىندىعى مەن قىزىعى كورىنىس تابادى.
تانىستىرىلىم كەزىندە ءسوز سويلەگەن وقۋ-اعارتۋ ءمينيسترى عاني بەيسەمبايەۆ مادەنيەت جانە اقپارات مينيسترلىگىمەن بىرلەسىپ، فيلمدى ەلىمىزدىڭ باستى تەلەارنالارىنان كورسەتۋ جانە بارلىق وڭىرلەردە پەداگوگتەر قاۋىمداستىعى اراسىندا تاراتۋ جونىندە ۇسىنىس ءبىلدىردى.
- مەملەكەت باسشىسى پەداگوگتاردىڭ قوعامىمىزدا ماڭىزدى ءرول اتقاراتىنىن اتاپ وتكەن بولاتىن. بۇل سوزدەر پەداگوگتاردى قولداۋعا جانە ءبىلىم ساپاسىن ارتتىرۋعا باعىتتالعان ناقتى قادامدارمەن بەكىتىلدى. العاشقى جانە ماڭىزدى قادامداردىڭ ءبىرى 2019-جىلى ق ر «پەداگوگ مارتەبەسى تۋرالى» زاڭىنىڭ قابىلدانۋى بولدى، ول پەداگوگتاردىڭ جۇمىس جۇكتەمەسىن ازايتۋ، ارتىق فۋنكسيالاردان بوساتۋ جانە جاڭا ىنتالاندىرۋ شارالارىن ەنگىزۋ ماسەلەلەرىن رەتتەدى. وسى فيلمنىڭ نەگىزگى ميسسياسى - پەداگوگتىڭ تەك ماماندىق ەمەس، ناعىز شاقىرۋ، ميسسيا ەكەندىگىن كورسەتۋ. ولاردىڭ قوعامداعى ءرولىن تەرەڭ تۇسىنۋگە، جاس مۇعالىمدەر ءۇشىن جاۋاپكەرشىلىكتى سەزىنۋگە جانە كاسىبي دامۋعا شابىتتاندىراتىن ماڭىزدى سەبەپ بولاتىنىنا سەنەمىن، - دەدى مينيستر.
«ۇستاز» فيلمىنىڭ يدەيا اۆتورى - بەيسەن قۇرانبەك، سەناريىن جازعان - گۇلميرا قادىر قىزى. ال فيلم كەيىپكەرلەرىنىڭ رولدەرىن جەتىسۋ وبلىستىق دراما تەاترىنىڭ جانە وقۋشىلار سارايىنداعى پوەتيكالىق تەاتردىڭ اكتەرلەرى سومداعان. فيلم جەتىسۋ تەلەارناسىنىڭ قولداۋىمەن وڭىردە تۇسىرىلگەن. الداعى ۋاقىتتا ول ەلىمىزدىڭ باس تەلەارنالارىنان كورسەتىلمەك.
