استانادا سامميتىنەن باستاپ ش ى ۇ تولىققاندى «شاڭحاي وندىعى» فورماتىندا جۇمىس ىستەيدى
استانا. KAZINFORM - استانادا سامميتىنەن باستاپ شاڭحاي ىنتىماقتاستىق ۇيىمى تولىققاندى «شاڭحاي وندىعى» فورماتىندا جۇمىس ىستەيدى. بۇل تۋرالى قىتايدىڭ شينحۋا اقپارات اگەنتتىگىنە سۇحبات بەرگەن مەملەكەت باسشىسى قاسىم-جومارت توقايەۆ ايتتى.
«ءوز باسىم شاڭحاي ىنتىماقتاستىق ۇيىمىمەن ەرەكشە قارىم-قاتىناستا بولعانىمنان باستايىن. 1996 -جىلى ساۋىردە ونىڭ قۇرىلۋىنا، كەلىسسوزدەرگە جانە قۇجاتتاردى دايىنداۋعا قاتىسۋعا مۇمكىندىگىم بولدى. «شاڭحاي بەستىگى» قۇرىلۋىنىڭ باستاۋىنان- اق ءوزىنىڭ ورشىلدىگىن كورسەتتى جانە بۇگىنگى كۇنگە دەيىن ساقتالىپ وتىرعان نەگىزگى ماقساتى - سەنىم شارالارىن ارتتىرۋ توڭىرەگىندە قالىپتاستى. وسى جىلدىڭ 3-شىلدەسىندە، شيرەك عاسىردان ءسال استام ۋاقىتتان كەيىن شاڭحايلىق ۇلكەن وتباسىنىڭ جيىنى قازاقستانعا ورالۋى وتە سيمۆوليكالىق مانگە يە. وسى جىلدار ىشىندە «شاڭحاي بەستىگىنىڭ» قۇرامى ەكى ەسەگە ۇلعايىپ، استاناداعى سامميتتەن باستاپ ۇيىم تولىققاندى «شاڭحاي وندىعى» فورماتىندا جۇمىس ىستەي باستايدى»، - دەدى مەملەكەت باسشىسى.
قاسىم- جومارت توقايەۆ ش ى ۇ- عا ءتوراعالىق اسا ماڭىزدى ءارى سونىمەن بىرگە وتە جاۋاپتى ميسسيا ەكەنىن ەرەكشە اتاپ ءوتتى.
«ۇيىمنىڭ نەگىزىن قالاۋشىلاردىڭ ءبىرى جانە كوپجاقتى ديالوگتى دامىتۋدىڭ بەلسەندى قولداۋشىسى رەتىندە قازاقستان ۇيىمدى ءوزىنىڭ تەڭگەرىمدى سىرتقى ساياساتىنداعى تۇراقتى باسىمدىق رەتىندە قاراستىرادى. ءتوراعالىعىمىزدىڭ قاعيداتتارى مەن كەڭ اۋقىمدى كۇن ءتارتىبىن ازىرلەۋ كەزىندە دە ءدال وسى ۋاجدەر باسشىلىققا الىندى. ءبىزدىڭ كۇش-جىگەرىمىز قاۋىپسىزدىك ماسەلەلەرىن شەشۋدىڭ ورتاق تاسىلدەرىن ازىرلەۋگە، ساۋدا- ەكونوميكالىق ىنتىماقتاستىقتى نىعايتۋعا، ەكولوگيانى قورعاۋعا جاردەمدەسۋگە جانە حالىقتارىمىز اراسىنداعى دوستىق بايلانىستاردى نىعايتۋعا باعىتتالاتىن بولادى» - دەدى قاسىم- جومارت كەمەل ۇلى.
پرەزيدەنتتىڭ اتاپ وتۋىنشە، ۇيىمنىڭ ءىرى حالىقارالىق جانە وڭىرلىك قۇرىلىمدارمەن بايلانىسىن كەڭەيتۋ ارقىلى ونىڭ حالىقارالىق بەدەلىن ودان ءارى نىعايتۋ ماڭىزدى مىندەت سانالادى. قازىردىڭ وزىندە 150دەن استام ءىس- شارا وتكىزىلدى: نيۋ- يوركتەن بەيجىڭگە، نايروبيدەن ماسكەۋگە دەيىن. وسىلايشا، ش ى ۇ سەرىكتەستەرىنىڭ اياسى كەڭەيىپ، قۇقىقتىق بازا ءبىرقاتار قۇجاتپەن تولىعادى.
«ءتوراعالىعىمىزدىڭ شارىقتاۋ شەگى استاناداعى سامميت بولادى، وعان ءبىز باسا كوڭىل بولەمىز. ءبىز ش ى ۇ- نى ودان ءارى جەتىلدىرۋ سالاسىندا ستراتەگيالىق ماڭىزدى شەشىمدەر قابىلدانادى دەپ كۇتەمىز. ورتا مەرزىمدى كەلەشەككە ارنالعان ءوزارا ءىس- قيمىلدىڭ نەگىزگى باعىتتارى ايقىندالىپ، اعىمداعى سىن- قاتەرلەر مەن قاۋىپتەرگە بارابار جانە ۋاقتىلى دەن قويۋ ءۇشىن باستامالار ازىرلەنەتىن بولادى. وسى مۇمكىندىكتى پايدالانا وتىرىپ، ش ى ۇ- عا مۇشە بارلىق مەملەكەتكە قازاقستان ءتوراعالىعىنىڭ باستامالارىن قولداعانى، ۇسىنىستارىمىزبەن نيەتتەستىكتەرى جانە ءبىز ۇسىنعان باسىمدىقتار اياسىنداعى بىرلەسكەن جۇمىسى ءۇشىن شىنايى العىسىمدى بىلدىرگىم كەلەدى. ءسامميتتىڭ قورىتىندى شەشىمدەرىندە «شاڭحاي رۋحىنىڭ» ىرگەلى قاعيداتتارى - ءوزارا سەنىم، دوستىق، ءوزارا تيىمدىلىك جانە ءبىر- ءبىرىنىڭ مۇددەلەرىن ەسكەرۋ تولىق قامتىلادى دەپ كۇتەمىز»، - دەدى پرەزيدەنت.
