استانادا قوقىس پەن قالدىقتاردى شىعارۋ ءتاريفى ءوستى

بۇگىن ەلوردا ءماسليحاتىنىڭ كەزەكتەن تىس سەسسياسىندا استانا قالاسى قورشاعان ورتانى قورعاۋ جانە تابيعاتتى پايدالانۋ باسقارماسىنىڭ باسشىسى داۋلەت دوسقۇلوۆ قازىرگى تاريف كەيىنگى 5 جىل بويى وزگەرمەگەنىن ايتتى.

- قازىرگى تاريف ءبىر ادامعا ايىنا 390 تەڭگە سوماسىندا ەسەپتەلىپ وتىر. ونىڭ سوماسى 5 جىل بويى، ياعني 2019-جىلدان بەرى تاريف وزگەرىسسىز بولدى، ال الماتىدا قازىردىڭ وزىندە 718 تەڭگە. ورتاشا ەسەپپەن 300 مىڭ ادام تۇراتىن ەلىمىزدىڭ التى شاعىن قالاسىندا تاريف 400-500 تەڭگەگە دەيىن ءوستى... مىندەتتەمەلەردى ورىنداۋ ءۇشىن كومپانيالار ءوز قاراجاتتارى ەسەبىنەن قۇنى 4,1 ميلليارد تەڭگەگە 100 جاڭا قوقىس شىعاراتىن كولىك پەن 1 ميلليارد تەڭگەگە جۋىق 15 مىڭ جاڭا كونتەينەر ساتىپ الدى. سونداي-اق قوقىس تاسىمالدايتىن كولىكتەردىڭ باعىتتارىن، كونتەينەرلەردىڭ جاي-كۇيىن جانە ولاردىڭ تولتىرىلۋىن ونلاين باقىلاۋعا مۇمكىندىك بەرەتىن ارنايى جۇيە ەنگىزىلدى. وسى شارالاردىڭ ناتيجەسىندە قالادا وڭ ديناميكا بايقالىپ وتىر، - دەدى داۋلەت دوسقۇلوۆ.

ونىڭ ايتۋىنشا، حالىق سانى 36 پايىزعا وسكەن كەزدە، قالدىقتاردى شىعارۋ شىعىندارى 103 پايىزعا وسكەن. ماسەلەن، كاسىپورىنداردىڭ ناقتى شىعىندارى 2019-جىلى 260 ميلليون تەڭگە بولسا، 2024-جىلى 544 ميلليون تەڭگەگە جەتكەن. بۇل كورسەتكىشتەر قازىرگى تاريفپەن بيزنەسكە ءتيىمسىز ەكەنىن بايقاتىپ وتىر. تاريف كىرىستەردەن جانە كاسىپورىنداردىڭ تابىستىلىعى مەن شىعىستارى نەگىزىندە قالىپتاسادى.

- بۇرىن بەرىلگەن بارلىق ەسكەرتۋدى جانە ۇسىنىستاردى ەسكەرە وتىرىپ، سونداي-اق تۇرعىندارعا تۇسەتىن سالماقتى ازايتۋ ماقساتىندا تاريفتى اباتتاندىرىلعان سەكتوردىڭ ءبىر تۇرعىنىنا 637 تەڭگە جانە اباتتاندىرىلماعان اۋماقتا 679 تەڭگە مولشەرىندە بەكىتۋ ۇسىنىلادى، - دەدى باسقارما باسشىسى.

ەلوردادا قولدانىستاعى تاريفتەر اياسىندا حالىقتىڭ الەۋمەتتىك وسال توپتارىنا ازاماتتاردىڭ ساناتىنا قاراي 25 پايىزدان 100 پايىزعا دەيىن جەڭىلدىكتەر قاراستىرىلعان. سونىمەن قاتار، جەڭىلدىكتەر مۇگەدەكتىگى بار، جەتىم بالالاردى تاربيلەپ وتىرعان وتباسىلارعا، كوپبالالى وتباسىلارعا تارالادى.

بۇدان بۇرىن حابارلانعانداي، بۇگىن ەلوردا ءماسليحاتىنىڭ كەزەكتەن تىس سەسسياسىندا استاناداعى بەينەباقىلاۋ جۇيەسىنە جاساندى ينتەللەكتتى ەنگىزۋگە قاتىستى شەشىم قابىلداندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى