استانادا قولونەر شەبەرلەرىنىڭ تۋىندىلارى قويىلعان فەستيۆال ءوتىپ جاتىر
«جاستار» سارايىندا ەلىمىزدىڭ ەڭ ۇزدىك قولونەر شەبەرلەرىنىڭ تۋىندىلارى قويىلعان «حاس شەبەرلەر» فەستيۆالى ۇيىمداستىرىلدى، دەپ حابارلايدى Kazinform ەلوردا اكىمدىگىنىڭ رەسمي سايتىنا سىلتەمە جاساپ.
ءىس- شارا استانا قالاسى اكىمدىگىنىڭ قولداۋىمەن وتكىزىلىپ جاتىر. حاس شەبەرلەردىڭ قولىنان شىققان جاسىل تۋ ەلىمىزدىڭ ەڭ مىقتىلارى عانا ەنەتىن كينەس رەكوردتار كىتابىنا جازىلماق.
فەستيۆالدىڭ اشىلۋىنا استانا قالاسى اكىمىنىڭ ورىنباسارى ەسەت بايكەن قاتىسىپ، تىلەكتەرىن ءبىلدىردى، سول سياقتى ەلىمىزدىڭ تۇكپىر-تۇكپىرىنەن جينالعان شەبەرلەر باس قوستى.
ەل تاريحىندا بۇرىن-سوڭدى بولماعان، جۇزدەگەن ەڭ ۇزدىك قولونەر شەبەرلەرىنىڭ قولىمەن تىگىلگەن جاسىل ءتۇستى تۋدىڭ اتاۋى - «بىرلىك، بەرەكە، مەيىرىمدىلىك» دەپ اتالادى. ول - تابيعاتقا، بولاشاققا تالپىنۋدى بىلدىرەدى.
«بۇل فەستيۆال - قولونەر شەبەرلەرىنىڭ كوپتەن كۇتكەن ەڭبەگىنىڭ ناتيجەسى، كۇنى-ءتۇنى جاساعان جۇمىسىنىڭ جەمىسى. سەبەبى، ءبىرازدان بەرى وسى ءىس-شارانى وتكىزۋگە مۇقيات دايىندالدىق، وسى اۋقىمدى فەستيۆال بيىل ءبىرىنشى رەت وتكىزىلىپ وتىر. جالپى بۇعان دەيىن 2019 -جىلى استاناداعى بايقوڭىر اۋدانىنىڭ اكىمدىگىمەن قولونەرشىلەر ءىس-شاراسى العاش رەت ۇيىمداستىرىلعان. ماقساتى - كرەاتيۆتى يندۋستريانى دامىتۋ، وتاندىق ءونىمدى قولداۋ، بولاشاققا قولونەر بۇيىمدارىن، شەبەرلىك ساباقتارىن ناسيحاتتاۋ. ماڭىزدى ءىس-شاراعا ەلىمىزدىڭ تۇكپىر- تۇكپىرىنەن 300-گە جۋىق ناعىز ءوز ءىسىنىڭ شەبەرلەرى كەلدى. فەستيۆالعا ۇلكەندەر جاعى عانا ەمەس، قولىنان ءىس كەلەتىن جاستار، جاسوسپىرىمدەر دە قاتىسۋدا. سونداي- اق شەبەرلەردىڭ قولىنان شىققان جاسىل ءتۇستى تۋدى قازاقستاننىڭ رەكوردتار كىتابى كينەس- كە ەنگىزىلگەلى وتىر»، - دەدى قازاقستاننىڭ «حاس شەبەرلەر» وتاندىق ونىمدەردى دامىتۋ قاۋىمداستىعىنىڭ ءتوراعاسى، فەستيۆالدى ۇيىمداستىرۋشىلاردىڭ ءبىرى زيۋار جۇمانوۆا.
ەلىمىزدىڭ بارلىق وڭىرىنەن كەلگەن شەبەرلەردىڭ استاناداعى تاماشا كورمەسى، ءسان-fashion جانرىنداعى كوركەم دۇنيەلەر كورگەن جاندى ءتانتى ەتتى. اسىرەسە، اباي، تۇركىستان، قىزىلوردا، جامبىل، باتىس قازاقستان، اتىراۋ، ماڭعىستاۋ، اقتوبە، اقمولا، تاعى باسقا وڭىرلەردەن كەلگەن حاس شەبەرلەر قولىمەن جاساعان تۋىندىلارىن كوپشىلىككە ۇسىندى.
ونىمدەردى جۇننەن توقىعان اۋلەتتىڭ ءۇشىنشى ۇرپاعىمىز دەگەن گۇلنار شەبەردىڭ قولىنان شىققان دۇنيەلەر ايرىقشا اسەر قالدىرعانى راس.
«مەن جاسىمنان كيىز ءۇيدىڭ ىشىندە، كيىزدىڭ ۇستىندە ءوستىم. اقمولا وبلىسىنىڭ اۋىلىنداعى بالالىعىم اتتىڭ ۇستىندە، ءجۇن توقىپ، كيىز باسۋمەن ءوتتى. اكەم تىگىنشى بولدى، تۋىسقاندارىم شەتىنەن ونەرلى، سۋرەتشى، ىسمەر بولدى. مەن حورەوگرافيا ماماندىعىن بىتىرسەم دە، قازىر وسى اتا كاسىپتى جالعاستىرۋدى ماقسات ەتتىم دەيدى»، - ول.
فەستيۆالدىڭ سوڭعى كۇنىندە 19-جەلتوقساندا قولونەرشىلەر قىزىل كىلەممەن ءجۇرىپ ءوتىپ، حاس شەبەرلەر شەرۋىن كورسەتەدى، ءسويتىپ، ەلىمىزدىڭ كينەس رەكوردتار كىتابىنا ەنەدى.
اۆتور
ابىلايحان جۇماشيەۆ
