استانادا قاۋىپتى جارنامالار ءوشىرىلىپ جاتىر
استانا. KAZINFORM - ەلوردانىڭ الماتى اۋدانىندا «زاڭ جانە ءتارتىپ» اكسياسى اياسىندا ەسىرتكى گراففيتيلەرىن انىقتاۋ جانە جويۋ بويىنشا رەيد جۇرگىزىلدى. بۇل تۋرالى استانا قالاسى اكىمدىگى حابارلادى.
تىيىم سالىنعان زاتتاردىڭ جارناماسىمەن كۇرەسۋگە باعىتتالعان اكتسيانى اۋدان اكىمدىگىنىڭ ۇيىمداستىرۋىمەن قۇقىق قورعاۋ ورگاندارى جانە «استانا جاستارى» جاستار رەسۋرستىق ورتالىعىنىڭ ەرىكتىلەرى قولعا الدى.
شارانىڭ ماقساتى - قاۋىپتى جازۋلاردى جويۋ عانا ەمەس، جاستار اراسىندا ەسىرتكىنىڭ تارالۋىنا جول بەرمەۋ. رەيد بارىسىندا قاتىسۋشىلار اۋدان اۋماعىنداعى تۇرعىن ۇيلەردىڭ، جاتاقحانالار مەن عيماراتتاردىڭ قابىرعالارىنا ىلىنگەن جازۋلار، سىزبالار، QR كودتار جانە باسقا دا جارناما ەلەمەنتتەرىن بويادى.
الاڭداتارلىق جاعداي، مۇنداي گراففيتيدىڭ ەداۋىر بولىگى ستۋدەنتتەر تۇراتىن وقۋ ورىندارى مەن جاتاقحانالاردىڭ جانىنان تابىلدى. الماتى اۋدانى اكىمدىگىنىڭ ىشكى ساياسات ءبولىمىنىڭ باس مامانى مۇرات ماراتوۆتىڭ ايتۋىنشا، جاستاردىڭ قاۋىپسىزدىگىن قامتاماسىز ەتۋ ءۇشىن مۇنداي شارالاردىڭ ماڭىزى ەرەكشە.
- بۇگىن ءبىز قوعامدىق ورىنداردا كورىنىس تاپقان ەسىرتكى جارنامالارىن جويۋ بويىنشا اۋقىمدى اكتسيا جۇرگىزدىك. مۇنداي جازۋلار كوبىنەسە ۋنيۆەرسيتەتتەر مەن ستۋدەنتتەر جاتاقحانالارىنىڭ ماڭىندا پايدا بولىپ جاتىر. ال بۇل جاستارعا ۇلكەن قاۋىپ توندىرەدى. تابىلعان گراففيتيلەردىڭ بارلىعىن بوياپ تاستادىق. قالا تۇرعىندارىن ساق بولۋعا شاقىرامىز، ەگەر مۇنداي جازۋلاردى بايقاساڭىز، بەي- جاي قاراماي، اكىمدىككە نەمەسە قۇقىق قورعاۋ ورگاندارىنا حابارلاڭىز، - دەدى مۇرات ماراتوۆ.
مۇنداي رەيدتەر ەلوردانىڭ بارلىق اۋدانىندا تۇراقتى تۇردە وتكىزىلىپ تۇرادى. بيلىك ازاماتتاردى ەلوردادا تازالىق پەن ءتارتىپتى ساقتاۋ جونىندەگى باستامالارعا قوسىلۋعا شاقىرادى.
