استانادا قاڭعىباس يتتەر مەن مىسىقتاردىڭ قىرىلىپ جاتقانى راس پا
الەۋمەتتىك جەلىدە استانادا قاڭعىباس يتتەر مەن مىسىقتاردىڭ ءولىپ جاتقانى تۋرالى اقپارات تارادى.
جازبا اۆتورىنىڭ ايتۋىنشا، ۋاقىتشا ۇستاۋ مەكەمەسىندە جاعداي مۇلدەم ناشار، سالدارىنان يتتەر مەن مىسىقتار قىرىلىپ جاتىر. ءىستىڭ ءمان-جايىن انىقتاۋ ءۇشىن Kazinform اگەنتتىگى ەلوردانىڭ قالالىق ورتا ساپاسى جانە باقىلاۋ باسقارماسىنا رەسمي ساۋال جولدادى.
«جىل باسىنان بەرى 8446 قاڭعىباس جانۋار ۇستالدى. ۇستالعان يتتەر مەن مىسىقتار يەسىنە قايتارىلعانشا نەمەسە باسقا ادامعا اسىراۋعا بەرىلگەنشە ۋاقىتشا ۇستاۋ پۋنكتىندە 60 كۇن ۇستالادى. 60 كۇننەن كەيىن يتتەر مەن مىسىقتار «ستوپ وتلوۆ» ەرىكتىلەر ۇيىمىنا بەرىلەدى. سونداي-اق، 60 كۇن ىشىندە ولارعا قۇرتتارعا قارسى دەگەلمينتيزاتسيا، قۇتىرۋعا قارسى ۆاكسيناتسيا جانە چيپتەۋ سياقتى ۆەتەريناريالىق-پروفيلاكتيكالىق شارالار جۇرگىزىلەدى»، - دەلىنگەن رەسمي جاۋاپتا.
باسقارمانىڭ اقپاراتىنا سايكەس، قازىر ۋاقىتشا ۇستاۋ پۋنكتىندە 3000 ءيت جانە 236 مىسىق بار.
جىل باسىنان بەرى 3089 ءيت پەن 590 مىسىق ارنايى جابدىقتالعان ينسينەراتور پەشىندە جويىلدى.
«ۋاقىتشا ۇستاۋ پۋنكتىندە قاڭعىباس يتتەر مەن مىسىقتاردىڭ كۇتىپ، باپتاۋمەن 10-15 ادام اينالىسادى («ستوپ وتلوۆ» 5-10 ەرىكتى جانە كاسىپورىننىڭ 8 قىزمەتشىسى). ولاردىڭ مىندەتىنە كۇندەلىكتى تازالاۋ، يتتەر مەن مىسىقتاردى سۋارۋ جانە تاماقتاندىرۋ كىرەدى. استانا قالاسى ءماسليحاتىنىڭ 2022-جىلعى 30- قىركۇيەكتەگى 238/32№ -VII «استانا قالاسىندا يتتەر مەن مىسىقتاردى اۋلاۋ، ۋاقىتشا ۇستاۋ جانە جانسىزداندىرۋ قاعيدالارىن» شەشىمىنىڭ 29-بابىنىڭ 4-تاراۋىنا سايكەس، قاڭعىباس يتتەر مەن مىسىقتاردى ۋلاۋعا، حيميالىق پرەپاراتتاردى پايدالانۋعا جانە كەز كەلگەن تاسىلمەن جانسىزداندىرۋعا جول بەرىلمەيدى»، - دەيدى باسقارمادان.
