استانادا مىڭ ورىندىق «ستۋدەنتتەر ءۇيى» سالىنادى

كاسىپتىك ءبىلىم بەرۋدى دامىتۋ تۋرالى كوممۋنيكاتسيالار قىزمەتىندە وتكەن بريفينگتە استانا قالاسى ءبىلىم باسقارماسىنىڭ باسشىسى قاسىمحان سەنعازىيەۆ ايتتى.

باسقارما باسشىسىنىڭ ايتۋىنشا، 2025-جىلعا قاراي ەلورداداعى جاستاردىڭ 100 پايىزى تەگىن تەحنيكالىق جانە كاسىپتىك بىلىممەن قامتاماسىز ەتىلەدى.

رەزيدەنت ەمەس ستۋدەنتتەردى جاتاقحانالارداعى ورىندارمەن قامتاماسىز ەتۋ ماقساتىندا 1000 ورىندىق «ستۋدەنتتەر ءۇيى» سالىنادى.

سۇرانىسقا يە كادرلاردى دايارلاۋ ءۇشىن ماماندارعا قاجەتتىلىكتىڭ وڭىرلىك كارتاسى - جاڭا كاسىپتەر اتلاسى ازىرلەندى.

«قالانىڭ ەڭبەك نارىعىندا الداعى 3-5 جىلدا سۇرانىسقا يە بولاتىن ماماندىقتار تۋرالى تۇسىنىك پايدا بولدى.

بيىل قالانىڭ كاسىپورىندارىمەن، سونداي-اق وڭىرلىك كاسىپكەرلەر پالاتاسىمەن بىرلەسىپ، دۋالدى وقىتۋ بويىنشا جۇمىس جۇرگىزىلدى. بۇگىنگى تاڭدا دۋالدى وقىتۋ جۇيەسىنە 298 كاسىپورىننىڭ قاتىسۋىمەن 60 ماماندىق بويىنشا 23 كوللەدج تارتىلدى»، - دەدى قاسىمحان سەنعازىيەۆ.

2023-جىلى ەلوردالىق ءۇش كوللەدجدە العاش رەت 10-11- سىنىپ وقۋشىلارىنا (170 وقۋشى) ارنالعان ماماندىقتار بويىنشا ەكسپەريمەنتتىك ءبىلىم بەرۋ باعدارلامالارى ەنگىزىلدى.

پيلوتتىق جوباعا سايكەس، 1,5 جىلدان كەيىن ورتا ءبىلىم تۋرالى اتتەستاتپەن بىرگە وقۋشىلار تىگىنشى، اسپاز، اۆتوگازبەن دانەكەرلەۋشى ماماندىقتارى بويىنشا ديپلوم الادى.

سونىمەن قاتار بيىل كاسىپورىندار مەن ۇيىمداردىڭ وتىنىمدەرى بويىنشا كادرلاردى نىسانالى دايارلاۋعا مەملەكەتتىك تاپسىرىس 500 دەن 1000 ورىنعا دەيىن ۇلعايدى.

2023-جىلدىڭ قورىتىندىسى بويىنشا كوللەدجدى 7,5 مىڭ ستۋدەنت ءبىتىردى، ونىڭ ىشىندە 6,4 مىڭ ستۋدەنت جۇمىسقا ورنالاستىرىلدى (3,5 مىڭ ستۋدەنت ماماندىق بويىنشا جۇمىسقا ورنالاستى).

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى