استانادا موبيلدى ينتەرنەت ءالسىز ۇستايتىن ورىندار جىل سوڭىنا دەيىن جويىلادى

- استانا قالاسى بويىنشا ايتار بولساق، وتكەن جىلى ءبىز وسىنداي 32 نۇكتەنى انىقتادىق. بۇل ەلورداداعى موبيلدىك ينتەرنەت ءالسىز ۇستايتىن نە مۇلدە ۇستامايتىن جەرلەر. قازىرگى تاڭدا مۇنداي 10 «اق نۇكتە» جويىلدى، وندا انتەننالار قويىلدى. وسى باعىتتاعى جۇمىستار جالعاسىپ جاتىر، - دەدى كوميتەت باسشىسى ۇكىمەت وتىرىسىندا Kazinform ءتىلشىسىنىڭ ساۋالىنا جاۋاپ بەرە وتىرىپ.

ونىڭ ايتۋىنشا، سيفرلاندىرۋ مينيسترلىگى 5G تەحنولوگياسىن ەنگىزۋ جۇمىستارىن جۇرگىزىپ جاتىر.

- ەكىنشى باستاما ادامدار كەشكە ۇيىنە ورالعان كەزدە موبيلدى ينتەرنەت السىرەيتىن، ال باسقا ۋاقىتتا قالىپتى ۇستاپ تۇراتىن اۋماقتارعا قاتىستى. قازىرگى تاڭدا استانادا 250 دەن استام بازالىق ستانسالار ورناتىلدى. بۇل دا ترافيكتىك جۇكتەمەنى ازايتۋعا كومەكتەسەدى. مەملەكەت باسشىسى بىزگە جىل سوڭىنا دەيىن 5G تەحنولوگياسىن ەنگىزۋ جۇمىستارىن اياقتاۋدى تاپسىرعان بولاتىن. ءبىز سول مەجەدەن شىعۋ ءۇشىن بارىمىزدى سالىپ جاتىرمىز، - دەدى دامير سەيسەمبەكوۆ.

ودان بولەك، مينيسترلىك ەلوردا تۇرعىندارى سانىنىڭ ۇنەمى ءوسىپ وتىراتىنىنا بايلانىستى «اق نۇكتەلەردى» انىقتاۋ جۇمىسىن ۇنەمى جۇرگىزىپ تۇراتىنىن ايتتى.

- استانانىڭ اۋماعى عانا ەمەس، ونداعى تۇرعىندار سانى دا ءوسىپ كەلەدى. سوعان ساي، ينتەرنەت تۇتىنۋشىلارى دا ارتادى. بۇرىن ءبىر ۇيدە 1-2 سمارتفون عانا بولسا، قازىر ول 5 قۇرىلعىدان دا اسىپ ءتۇسۋى مۇمكىن. تەلەۆيزور، نوۋتبۋك، تەلەفوندار دەگەندەي. سول سەبەپتى ءبىز «اق نۇكتەلەردى» انىقتاۋ جانە باقىلاۋ جۇمىستارىن توقتاۋسىز جۇرگىزىپ وتىراتىن بولامىز. بيىل ۇلكەن قالالاردا وسىنداي جۇمىستار جۇرگىزىلەدى، ودان سوڭ تراسسالار مەن باسقا دا نىسانداردى قولعا الامىز، - دەدى سپيكەر.

سەيسەمبەكوۆ جىل سوڭىنا دەيىن بۇعان دەيىن انىقتالعان «اق نۇكتەلەر» تولىعىمەن جويىلاتىنىن ايتادى.

- وتكەن جىلى موبيلدىك ينتەرنەت ۇستامايتىن نە ءالسىز ۇستايتىنى انىقتالعان ورىندار جىل سوڭىنا دەيىن تولىعىمەن قالىپقا كەلتىرىلەدى. ءبىز جاڭا بازالىق ستانسالار ورناتامىز. كەي جاعدايلاردا تۇرعىن ءۇي يەلەرى شاتىرىنا وسىنداي ستانسالار ورناتۋعا جول بەرمەيدى. ونداي جاعدايدا اۋلاعا انتەننا- دىڭگەك ورناتامىز. بۇل جۇمىستى اكىمدىكپەن بىرلەسە اتقارامىز جانە جىل سوڭىنا دەيىن 32 «اق نۇكتە» جويىلادى، - دەدى دامير سەيسەمبەكوۆ.

وسىعان دەيىن ۇكىمەت باسشىسى سيفرلاندىرۋ مينيسترلىگىنە شالعاي ەلدى مەكەندەردى ينتەرنەتپەن قامتاماسىز ەتۋ جوبالارىن ۋاقتىلى ىسكە اسىرۋدى تاپسىرعان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى