استانادا مەكتەپ فورماسى مەن وقۋ قۇرالدارى جارمەڭكەسى ءوتىپ جاتىر

«جارمەڭكە ءۇشىنشى جىل ۇيىمداستىرىلىپ وتىر، اتا-انا جانە كاسىپكەرلەر تاراپىنان دا سۇرانىس بار. بيىل جارمەڭكەگە شامامەن 70 استانالىق كاسىپكەر قاتىسىپ جاتىر، ولار مەكتەپ وقۋشىلارىنا ارنالعان بارلىق زاتتى ۇسىنادى. ەلوردا اكىمدىگىمەن بىرلەسە كەلە، نارىقتاعى باعادان تومەن ساتۋعا كەلىستىك، %10-15 عا ارزان دەۋگە بولادى»، - دەدى «QazExpoCongress» ۇلتتىق كومپانياسى باسقارما ءتوراعاسىنىڭ ءبىرىنشى ورىنباسارى داۋلەت قۋاندىق ۇلى.

«Kids EXPO. بالالار الەمى» اتاۋىمەن وتەتىن جارمەڭكە ءۇش كۇنگە (16-18-تامىز) سوزىلادى. كەلۋشىلەر ساۋدا جاساۋمەن قاتار، بالالارعا ارنالعان ويىن- ساۋىق باعدارلاماسىن، شاحماتتان شەبەرلىك ساعاتتارى، شىعارماشىلىق ستۋديالاردىڭ قويىلىمدارىن تاماشالاي الادى.

«جارمەڭكەگە ەگىز قىزىممەن كەلدىم، فورماعا مەكتەپ تاپسىرىس بەرەدى، ءبىز وقۋ قۇرالدارىن الۋعا كەلدىك. باعا ءارتۇرلى، اتا-انا شاماسىنا قاراي تاڭدايدى، بىرەۋ 5 مىڭ تەڭگە تۇراتىن ريۋكزاك السا، ەندى بىرەۋ 50 مىڭ تەڭگەگە الادى. قالتاسىنا قارايدى، قازىرگى بالالار وزدەرى تاڭداپ العىسى كەلەدى، ال اتا-اناعا سالسا ارزانىن الادى. مەن بالالارىما ەرىك بەردىم، وزدەرى تاڭداپ، ۇناعانىن الادى»، - دەيدى ەلوردا تۇرعىنى نازگۇل قاسىمحانوۆا.

سونداي-اق جارمەڭكەنى ۇيىمداستىرۋشىلار ارنايى اكتسيالار مەن جەڭىلدىكتەر بولاتىنىن ايتىپ وتىر.

«بۇگىنگى جارمەڭكەدە ءبىر بالاما ريۋكزاك پەن وقۋ قۇرالدارىن تەگىن بەردى، نەگىزى ءۇش بالام مەكتەپكە بارادى. ءبىر بالاعا مەكتەپكە دايىنداۋعا فورماسى مەن وقۋ قۇرالدارىن قوسا العاندا شامامەن 60 مىڭ تەڭگە جۇمسالادى، ءۇش بالاما 150-160 مىڭ تەڭگە قاجەت. بىلتىرعا قاراعاندا باعا وسكەن، بازاردا ارزانداۋ، ال ساۋدا ورتالىقتارىندا باعا ايىرماشىلىعى بار»، - دەدى استانالىق راحيا نۇرلىبايەۆا.

مەكتەپ جارمەڭكەسى تاڭعى ساعات 10:00-نان كەشكى ساعات 19:00-گە دەيىن جۇمىس ىستەيدى.

«وتكەن جىلعا قاراعاندا باعا وسكەن، ءبىر بالانى مەكتەپكە تولىق دايىنداۋعا شامامەن 100 تەڭگە كەرەك. بۇگىن جارمەڭكەنىڭ وتەتىنى تۋرالى الەۋمەتتىك جەلىدەن ءبىلدىم. ەندى كەلدىك، ءقازىر كورەمىز، جالپى باعا جىل ساناپ قىمباتتاپ جاتىر»، - دەدى وقۋشى بالاسىمەن كورمەگە كەلگەن قۇرالاي ءىلياسوۆا.

اۆتور
داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى