استانادا مۇعالىم فەيسبۋكتەگى جازباسى ءۇشىن سوتتا جەڭىلىپ، وتەماقى تولەيتىن بولدى
استانا. قازاقپارات - استانانىڭ اۋدانارالىق سوتى ار-نامىستى، قادىر-قاسيەت پەن ىسكەرلىك بەدەلدى قورعاۋ جونىندە قارالعان ءىستىڭ شەشىمىن شىعاردى. مەكتەپتەردىڭ ءبىرىنىڭ ديرەكتورى بۇرىن وزىمەن بىرگە ەڭبەك ەتكەن مۇعالىممەن سوتتاسقان، دەپ حابارلايدى Ulysmedia.kz.
داۋ نەدەن شىقتى
جۇمىستان شىعارىلعاننان كەيىن بۇرىنعى پەداگوگ Facebook الەۋمەتتىك جەلىسىندە مەكتەپ ديرەكتورىن ارەكەتسىزدىك جاسادى دەپ ايىپتاپ، جازبا جاريالاعان. جازبادا ول ديرەكتور وقۋشىلارعا ورىنسىز ارەكەتتەر جاساعان ۇيىرمە وقىتۋشىسىنا شارا قولدانباعانىن كەلتىرگەن. پوست اۆتورى ديرەكتوردىڭ ارەكەتى زاڭداردى بۇزادى دەپ مالىمدەگەن.
سوتتا نە انىقتالدى
ءىستى قاراۋ بارىسىندا فيلولوگيالىق-پسيحولوگيالىق زەرتتەۋ جۇرگىزىلگەن. ول جازبادا تالاپكەردىڭ ار-نامىسى مەن قادىر-قاسيەتىنە نۇقسان كەلتىرەتىن جاعىمسىز سوزدەر بار ەكەنىن راستالعان.
ازاماتتىق كودەكستىڭ 141 جانە 143-بابىنىڭ نورمالارىنا سايكەس، جاۋاپكەر ءوز مالىمدەمەسىنىڭ دۇرىستىعىن دالەلدەۋى ءتيىس، الايدا سوتقا ونداي دالەلدەمەلەر ۇسىنىلماعان.
سوت شەشىمى
سوت جازبادا جاريالانعان مالىمەتتەردى قاتە جانە ديرەكتوردىڭ ار-نامىسى مەن قادىر-قاسيەتىنە نۇقسان كەلتىرىلدى دەگەن شەشىم شىعاردى. جاۋاپكەردى:
داۋلى جازبانى جويۋعا؛
تەرىسكە شىعارۋدى جاريالاۋ جانە ءوز اككاۋنتىندا كەشىرىم سۇراۋعا.
سونىمەن قاتار، بۇرىنعى وقىتۋشى كەلتىرىلگەن مورالدىق زيان ءۇشىن وتەماقى تولەۋگە، سونداي-اق سوت شىعىندارىن وتەۋگە مىندەتتى.
سوت شەشىمى زاڭدى كۇشىنە ەنگەن.
