استانادا ماڭعىستاۋ وبلىسىنىڭ مادەني كۇندەرى باستالدى
استانادا 7-9- قاراشا كۇندەرى «ماڭعىستاۋدان مىڭ سالەم، الاش ءتورى» اتتى ماڭعىستاۋ وبلىسىنىڭ مادەني كۇندەرى وتەدى. ەلوردا تورىندە ماڭعاز مەكەننىڭ مادەني جاۋھارلارى جۇرتشىلىق نازارىنا ۇسىنىلادى. ءۇش كۇن بويى ولكە ونەرپازدارى ونەر كورسەتەدى، دەپ حابارلايدى Kazinform.
مادەني- رۋحاني ءىس- شارالار اياسىندا استانالىقتارعا ارناپ تەاتر قويىلىمدارى ساحنالانىپ، ماڭعىستاۋدىڭ ماقامدى جىر- داستانى، ءوڭىر ونىمدەرىنىڭ كورمە- جارمەڭكەسى، سونداي- اق ادەبي- سازدى كەشتەر مەن سالتاناتتى جيىندار ۇيىمداستىرىلادى.
«مادەنيەت - دۇنيەنىڭ قان تامىرى. رۋحانياتسىز ادام بالاسى ءومىر سۇرە المايدى، قوعام بولمايدى. ماڭعىستاۋدىڭ مادەني كۇندەرى ءبىرازدان بەرى سارى ارقا تورىندە وتپەگەن ەدى. بۇل رۋحاني تامىرىمىزعا جان بىتىرەتىن ءىس- شارا بولاتىن شىعار دەپ ويلايمىز. ونىڭ ىشىندە «ماھامى ءمۇشھۇر ماڭعىستاۋ» دەگەن كەرەمەت جوبا بار. ءبىرىنشى رەت ۇلكەن ساحنادا ورىندالادى»، - دەدى اقىن سۆەتقالي نۇرجان.
«ماڭعىستاۋدان مىڭ سالەم، الاش ءتورى!» ماڭعىستاۋ وبلىسىنىڭ استانا قالاسىندا وتەتىن كۇندەرىنىڭ باعدارلاماسى بويىنشا 7-8 -قاراشادا ساعات قۋىرشاق تەاترىنىڭ بالالارعا ارنالعان قويىلىمدارى، «قۇبىلۋ» سپەكتاكلى ساحنالانادى. «ماقامى ءماشھۇر ماڭعىستاۋ» كۇي كەشى وتەدى. ماڭعىستاۋ ونىمدەرىنىڭ كورمە- جارمەڭكەسى ۇيىمداستىرىلادى. «ماڭعىستاۋ - ۇلتتىق قۇندىلىقتار قۇنداقتالعان مەكەن» رۋحاني ءىس- شاراسى وتەدى.
ءا. كەكىلباي ۇلى اتىنداعى ماڭعىستاۋ وبلىستىق تاريحي- ولكەتانۋ مۋزەيىنىڭ ارحەولوگيا، ماڭعىستاۋ قازاقتارىنىڭ ⅩⅩ عاسىرداعى ۇلتتىق كيىم ۇلگىلەرى كورمەسى، ن. مۇحانوۆتىڭ «كۇمبىرلەيدى كۇمىستەر» كوللەكسياسىنان كورمە جانە قولونەرشى الدابەرگەن تىلەنبايەۆتىڭ سۇيەكتەن جاسالعان كارتينالارىنىڭ كورمەسى وتەدى.
سونداي- اق 8 -قاراشادا ماڭعىستاۋ وبلىسىنىڭ استانا قالاسىنداعى مادەني كۇندەرىنىڭ اشىلۋ سالتاناتىنىڭ گالا- كونسەرتى وتەدى.
9 -قاراشادا «اقيىق ولكە، العي- جىر» اتتى ماڭعىستاۋلىق اقىن- جازۋشىلاردىڭ ادەبي سازدى كەشى وتەدى. «قورعانسىزدىڭ كۇنى» سپەكتاكلى قويىلادى. «مەرەيلى مەكەن - مۇنارالى ماڭعىستاۋ» اتتى ابىل تاراق ۇلى اتىنداعى قازاق وركەسترىنىڭ كونسەرتى، ماڭعىستاۋ كۇندەرىنىڭ جابىلۋ سالتاناتى جوسپارلانعان.
اۆتور
ينديرا ساتەنباي
