استانادا ل ر ت بۇرعىلاۋ ستانسياسىنىڭ قۇرىلعىسى تۇراقتا تۇرعان كولىككە قۇلادى
استانادا جەڭىل رەلستى ترانسپورت (ل ر ت) قۇرىلعىسىمەن بايلانىستى جايسىز وقيعا بولدى. بۇرعىلاۋ ستانسياسىنىڭ قۇرىلعىسى رۇقسات ەتىلمەگەن جەرگە قويىلعان كولىككە قۇلادى، دەپ حابارلايدى Kazinform.
وسى وقيعاعا بايلانىستى City Transportation Systems كومپانياسى پىكىر ءبىلدىردى.
«21-قازان كۇنى ساعات 17:00-دە سىعاناق كوشەسىنىڭ بويىندا قۇرىلىس ءجۇرىپ جاتقان كەزدە بۇرعىلاۋ ستانسياسى وڭ جاقتاعى شىنجىر تابانىمەن اسفالتتىڭ بوس جەرىنە ءتۇسىپ كەتتى. سول ماڭدا رۇقسات ەتىلمەگەن جەردە «Hyundai» كولىگى تۇرعان. كولىكتىڭ سالونىندا ەشكىم بولماعان. بۇرعىلاۋ ستانسياسىنىڭ قۇرىلعىسى سول كولىككە قۇلادى»، - دەپ مالىمدەدى CTS كومپانياسىنىڭ وكىلدەرى.
وقيعا بولعان ايماق قورشالدى. قازىرگى تاڭدا وقيعا ورنىندا پوليتسيا جۇمىس ىستەپ جاتىر. زارداپ شەككەندەر جوق.
