استانادا بۇرىنعى مۇعالىم Facebook تەگى جازباسى ءۇشىن جازالاندى
استانا. KAZINFORM - استانا قالاسىنىڭ ازاماتتىق ىستەر جونىندەگى اۋدانارالىق سوتى مەكتەپ ديرەكتورىنىڭ بۇرىنعى وقىتۋشىسىنا قاتىستى ار-نامىسىن، قادىر-قاسيەتىن جانە ىسكەرلىك بەدەلىن قورعاۋ، سونداي-اق مورالدىق زياندى ءوندىرۋ تۋرالى تالاپ قويۋى بويىنشا ازاماتتىق ءىستى قارادى.
ءىستىڭ ءمان-جايلارىنان مۇعالىم جۇمىستان شىعارىلعاننان كەيىن Facebook الەۋمەتتىك جەلىسىندە مەكتەپ ديرەكتورىنىڭ زاڭداردى بۇزعانىن اتاپ، وقۋشىلارعا قاتىستى ورىنسىز ارەكەتتەر جاساعان ۇيىرمە وقىتۋشىسىنا قاتىستى شارا قولدانباعانى تۋرالى ايىپتاپ، حابارلاما تاراتقانى انىقتالدى.
فيلولوگيالىق-پسيحولوگيالىق زەرتتەۋدىڭ قورىتىندىسى بويىنشا جالپى اقپاراتتا تالاپ قويۋشىنىڭ ار-نامىسى مەن قادىر-قاسيەتىنە نۇقسان كەلتىرۋى مۇمكىن جاعىمسىز سوزدەر بار ەكەنى راستالدى.
ازاماتتىق كودەكستىڭ 141-جانە 143-باپتارىنا سايكەس جالپى مالىمەتتەردىڭ شىندىققا سايكەستىگىن دالەلدەۋ مىندەتى جاۋاپكەرگە جۇكتەلەدى.
جاۋاپكەر سوتقا تاراتىلعان مالىمەتتەردىڭ دۇرىستىعىن راستايتىن دالەلدەمەلەردى ۇسىنبادى.
سوت شەشىمىمەن جاريالانىمدا جاريالانعان فاكتىلەر شىندىققا جاناسپايدى جانە تالاپ قويۋشىنىڭ ار-نامىسى مەن قادىر-قاسيەتىنە نۇقسان كەلتىرىلگەن دەپ تانىلدى.
جاۋاپكەرگە جەكە اككاۋنتتا كەشىرىم سۇراۋ ارقىلى حابارلامانى الىپ تاستاۋ جانە اقپاراتتى جوققا شىعارۋ مىندەتى جۇكتەلدى. سونىمەن قاتار جاۋاپكەردەن مورالدىق زيان جانە سوت شىعىندارى ءوندىرىلدى.
سوت شەشىمى زاڭدى كۇشىنە ەندى.
