استانادا اۆتوبۋستان قۇلاپ تۇسكەن جولاۋشى ءۇشىن جۇرگىزۋشى جازالاندى
استانا. KAZINFORM - جەلى قولدانۋشىلارى جۇرگىزۋشىنىڭ بۇل ارەكەتىنە دە، قوعامدىق كولىكتى توقتاتپاعان جولاۋشىلارعا دا نارازى بولدى.
استانادا اۆتوبۋس جۇرگىزۋشىسى جولاۋشىلاردىڭ تولىق مىنگەنىنە كوز جەتكىزبەي، ايالدامادا ايەلدىڭ سالوننان قۇلاپ كەتۋىنە جول بەرگەنى ءۇشىن جاۋاپكەرشىلىككە تارتىلدى، دەپ حابارلادى Zakon.kz.
وقيعانىڭ ۆيدەوسى الەۋمەتتىك جەلىدە تاراپ كەتتى. ادام تولى اۆتوبۋسقا ايەل كىرىپ، كولىكتىڭ ەسىگى جابىلعان. اۆتوبۋس قوزعالا باستاعاندا ەسىك قايتادان اشىلىپ، ايەل ودان قۇلاپ كەتەدى. الايدا اۆتوبۋس جۇرگىزۋشىسى توقتاماي كەتە بەرگەن.
جەلى قولدانۋشىلارى جۇرگىزۋشىنىڭ بۇل ارەكەتىنە دە، قوعامدىق كولىكتى توقتاتپاعان جولاۋشىلارعا دا نارازى بولدى.
جولاۋشى زارداپ شەككەن جوق. تاسىمالداۋ ەرەجەلەرىن ساقتاماعانى ءۇشىن جۇرگىزۋشى جاۋاپقا تارتىلدى، - دەلىنگەن استانا قالالىق پوليتسيا دەپارتامەنتىنىڭ باسپا ءسوز قىزمەتىنىڭ حابارلاماسىندا.
